អាជ្ញាធរខេត្តក្រចេះ បានសម្រេចដកហូតដីប្រហែល៥០០ហិកតា ស្ថិតនៅឃុំចង្ក្រង់ ស្រុកចិត្របុរី ដើម្បីយកមករក្សាទុកជាសម្បត្តិរដ្ឋវិញ ក្រោយដីទាំងនោះត្រូវបានជនខិលខូចទន្ទ្រានយកទៅកាន់កាប់ដោយខុសច្បាប់។
កាលពីថ្ងៃទី៨ ខែកញ្ញា ឆ្នាំ២០២១ គណៈកម្មាធិការគ្រប់គ្រងដីរដ្ឋរបស់ខេត្តក្រចេះ បានចុះពិនិត្យទីតាំងជាក់ស្ដែង និងទប់ស្កាត់ការទន្ទ្រានយកដីព្រៃខុសច្បាប់ ស្ថិតនៅភូមិល្អ ឃុំចង្ក្រង់ ស្រុកចិត្របុរី ខេត្តក្រចេះ។
អភិបាលខេត្តក្រចេះ លោក វ៉ា ថន ប្រាប់ វីអូឌី នៅថ្ងៃចន្ទនេះថា ក្រោយចុះពិនិត្យមើលផ្ទាល់ អាជ្ញាធរបានរកឃើញស្នាមឈូសឆាយដីព្រៃ និងការទន្ទ្រានយកដីរដ្ឋដោយខុសច្បាប់ពីសំណាក់ជនខិលខូច ដែលមានទំហំប្រហែល៥០០ហិកតា។ លោកថា អាជ្ញាធរខេត្តកំពុងធ្វើការនេះ ដោយដកហូតដីនោះមករក្សាទុកជាសម្បត្តិរដ្ឋវិញ និងស្រាវជ្រាវរកអ្នកពាក់ព័ន្ធ ដើម្បីចាត់វិធានការតាមនីតិវិធីច្បាប់។
លោកបន្ថែមថា៖ «ខ្ញុំមិនបានចោទថាអាជ្ញាធរនៅហ្នឹងជាអ្នកលក់ទេ ប៉ុន្តែយើងបានដកហូតយកដីហ្នឹងមកធ្វើជាដីសង្គមកិច្ចវិញ ពីព្រោះអ្នកដែលរុករាននោះក៏មានប្រជាពលរដ្ឋក្រីក្រដែរ។ អ៊ីចឹងយើងដកយកដីនោះមកបែងចែកជាដីសង្គមកិច្ចជូនពួកគាត់វិញ។ យើងមិនអាចមកឈូសឆាយដីព្រៃរបស់រដ្ឋអ៊ីចឹងទេ»។
អភិបាលរងស្រុកចិត្របុរី លោក សន ចំរ៉ុង មានប្រសាសន៍ថា ដីព្រៃដែលឈូសឆាយរួចនោះមានទំហំជាង២១ហិកតាប៉ុណ្ណោះ។ លោកបន្តថា ចំពោះជនខិលខូចឈូសឆាយដីព្រៃរបស់រដ្ឋនេះ ខាងអាជ្ញាធរបានកសាងសំណុំរឿងបញ្ជូនទៅតុលាការកាលពីសប្តាហ៍មុនហើយ។
លោកបន្ថែមថា៖ «យើងបណ្ដឹងហ្នឹង យើងដាក់ជាអញ្ញតិជនទេ! ដោយសារពេលយើងចុះទៅហ្នឹង វាមិនមានអ្នកណា មិនមានមនុស្សឬគ្រឿងចក្រនៅទេ។ រឿងខេត្តដកហូតដីនោះទុក វាជាចំណាត់ការរបស់ខេត្ត ទុកខេត្តគាត់ជាអ្នកសម្រេច»។
មេឃុំចង្ក្រង់ អ្នកស្រី ពេញ ពៅ ប្រាប់ថាជាប់រវល់មិនអាចនិយាយបាន។
ពលរដ្ឋម្នាក់នៅឃុំចង្ក្រង់ ដែលសុំមិនប្រាប់ឈ្មោះដោយបារម្ភពីសុវត្ថិភាព បាននិយាយថា អ្នកដែលហ៊ានធ្វើសកម្មភាពឈូសឆាយដីព្រៃរបស់រដ្ឋក្នុងចំនួនច្រើនបែបនេះ គឺមានតែអ្នកមានលុយមានអំណាចប៉ុណ្ណោះ។ អ្នកភូមិរូបនេះបន្តថា ប្រជាពលរដ្ឋធម្មតាមិនហ៊ាន និងមិនមានលទ្ធភាពប្រើប្រាស់គ្រឿងចក្រយកទៅឈូសឆាយដីព្រៃច្រើនបែបនេះឡើយ។ ពលរដ្ឋដដែលបានដាក់ការសង្ស័យថា ករណីឈូសឆាយដីព្រៃនេះអាចមានការជាប់ពាក់ព័ន្ធឬការគប់គិតគ្នារវាងជនល្មើសនិងអាជ្ញាធរមូលដ្ឋានទៀតផង។
ពលរដ្ឋរូបនេះបន្ថែមថា៖ «វាមិនដែលគេឈូសឆាយដីព្រៃអស់ច្រើនម្ល៉ឹងហើយ អាជ្ញាធរភូមិឃុំមិនដឹងទេ ប្រហែលជាប់ពាក់ព័ន្ធ ឬគប់គិតគ្នា សូកលុយអីហើយ! ហើយអ្នកធ្វើបែបនេះ មានតែអ្នកមានលុយមានអំណាចទេ។ យើងពលរដ្ឋក្រីក្រ តែឈូសអ៊ីចឹង បើមិនគុក»។
គណៈកម្មការគ្រប់គ្រងសហគមន៍ព្រៃឈើអូដា នៅឃុំចង្ក្រង់ លោក ព្រុំ ឌឿន បានសាទរចំពោះវិធានការរបស់អាជ្ញាធរខេត្តដែលបានដកហូតដីនោះមកទុកជាសម្បត្តិរដ្ឋវិញ។ លោកថា នៅឃុំចង្ក្រង់មានដីព្រៃរបស់រដ្ឋរាប់រយហិកតាទៀត កំពុងត្រូវបានជនខិលខូចទន្ទ្រានកាន់កាប់យកនិងលក់បន្តទៅឱ្យអ្នកមានទ្រព្យ។
លោក ព្រុំ ឌឿន មើលឃើញថា កំហុសធំមួយរបស់អាជ្ញាធរឃុំ គឺការចុះហត្ថលេខាទទួលស្គាល់ការទិញលក់ដីព្រៃរបស់រដ្ឋ ដែលជំរុញឱ្យប្រជាពលរដ្ឋបន្តទៅទន្ទ្រានយកដីរដ្ឋលក់ទៅឱ្យឈ្មួញអ្នកមានទ្រព្យជាបន្តបន្ទាប់។
លោកបន្ថែមថា៖ «ប្រសិនជាអាជ្ញាធរខេត្តរកឃើញថា លោកស្រីមេឃុំគាត់មានកាងដី លក់ដីរដ្ឋមែន ខ្ញុំគិតថា អាជ្ញាធរខេត្តដកដីហ្នឹងវិញ គឺត្រឹមត្រូវហើយ។ គាត់ជាមន្ត្រីអនុវត្តច្បាប់ គាត់មិនគួរយកដីរដ្ឋលក់ទេ។ ហើយអាជ្ញាធរខេត្តគួរតែទុកដីហ្នឹងបែងចែកឱ្យពលរដ្ឋក្រីក្រនៅក្នុងឃុំ ពីព្រោះពលរដ្ឋនៅក្នុងឃុំចង្ក្រង់នេះ មានអ្នកខ្លះអត់ដីសម្រាប់បង្កបង្កើនផល គឺអត់ទាល់តែមែនទែន»៕
