ក្រុមប្រឹក្សាអាជ្ញាកណ្ដាល បានរុញការសម្រេចលើការទាមទារឱ្យទម្លាក់ចោលផែនការបញ្ឈប់ថ្នាក់ដឹកនាំសហជីព និងបុគ្គលិកណាហ្គាវើលដ៍ ជាង៣០០នាក់ ទៅអធិការការងារជាអ្នកសម្រេចវិញ ដែលករណីនេះ សង្គមស៊ីវិលថាជាកំហុសឆ្គងមួយធ្វើឱ្យប៉ះពាល់ប្រយោជន៍កម្មករនិយោជិត។
ក្នុងសេចក្តីបង្គាប់ចុះថ្ងៃទី១០ ខែកញ្ញា ឆ្នាំ២០២១ ដែលមានកម្រាស់៤៧ទំព័រ ក្រុមប្រឹក្សាអាជ្ញាកណ្តាល បានបដិសេធមិនពិចារណាលើការទាមទាររបស់ក្រុមសហជីព ដែលឱ្យក្រុមហ៊ុនណាហ្គាវើលដ៍បញ្ឈប់ផែនការកាត់បុគ្គលិកចំនួន៣៧៣នាក់ ដែលមានរាប់ទាំងថ្នាក់ដឹកនាំសហជីពទាំងអស់ តាមការស្នើរបស់ក្រុមហ៊ុន។
តាមប្រភពដដែល ក្រុមហ៊ុនបានលើកឡើងថា ខ្លួនបានជូនដំណឹងពីគម្រោងកាត់បន្ថយនេះទៅអធិការកិច្ចការងាររួចហើយ ហើយខាងអធិការការងារក៏បានអញ្ជើញភាគីក្រុមហ៊ុនទៅជួប ដើម្បីផ្តល់ព័ត៌មានពីគម្រោងកាត់រួចដែរ ប៉ុន្តែខាងអធិការការងារមិនទាន់ឆ្លើយតបឬផ្តល់យោបល់យ៉ាងណានៅឡើយ។
ប្រភពដដែលបន្តថា ដោយសារគម្រោងនេះ អធិការការងារកំពុងពិចារណាទៅតាមនីតិវិធីនៅឡើយ ហេតុនេះ ក្រុមប្រឹក្សាអាជ្ញាកណ្តាលនៅមិនទាន់អាចពិចារណាលើអង្គសេចក្តីនៃគម្រោងកាត់បន្ថយកម្មករនិយោជិតនោះទេ។
ក្នុងសេចក្តីបង្គាប់នោះបន្ថែមថា៖ «សរុបសេចក្តីមក ក្រុមប្រឹក្សាអាជ្ញាកណ្តាលសម្រេចបដិសេធការពិចារណាទាមទាររបស់កម្មករនិយោជិត ឱ្យនិយោជកបញ្ឈប់គម្រោងកាត់បន្ថយកម្មករនិយោជិតដែលកំពុងអនុវត្តនីតិវិធីបញ្ឈប់ពីការងាររួម»។
អ្នកគ្រប់គ្រងកម្មវិធីនៅមជ្ឈមណ្ឌលសម្ព័ន្ធការងារ និងសិទ្ឋិមនុស្ស ហៅកាត់ សង់ត្រាល់ លោក ឃុន ថារ៉ូ លើកឡើងនៅថ្ងៃទី១៣ ខែកញ្ញា ថាសេចក្តីសម្រេចរបស់ក្រុមប្រឹក្សាអាជ្ញាកណ្តាល គឺជាកំហុសឆ្គងផ្នែកនីតិវិធី ដែលនាំឱ្យដំណើរការដោះស្រាយវិវាទការងាររួមនៅក្រុមហ៊ុន ណាហ្គាវើលដ៍ បន្តអូសបន្លាយ។
លោកថា ក្រុមសហជីពបានដាក់ពាក្យបណ្តឹងទាមទារឱ្យក្រុមហ៊ុនបញ្ឈប់គម្រោងកាត់បុគ្គលិកទៅក្រសួងការងារ ហើយនាយកដ្ឋានវិវាទការងារបានសម្រេចបញ្ជូនសំណុំរឿងពាក្យបណ្តឹងទៅក្រុមប្រឹក្សាអាជ្ញាកណ្តាលដោះស្រាយបន្ត ប៉ុន្តែបែរជាក្រុមប្រឹក្សាអាជ្ញាកណ្តាលបដិសេធមិនកាត់សេចក្តី ហើយរុញមកអធិការការងារនៃនាយកដ្ឋានវិវាទវិញ ក្រោមហេតុផលថា សំណើនេះកំពុងស្ថិតក្នុងដៃអធិការការងារ។
លោក ថារ៉ូ មានប្រសាសន៍បន្ថែមថា៖ «អ៊ីចឹងចំណុចមួយនេះមានន័យថាម៉េច? វាសបញ្ជាក់ថា វាមានភាព Error មានកំហុសក្នុងការអនុវត្តនីតិវិធី។ ពីព្រោះអី? រឿងហ្នឹងជាចេតនាមួយ បើសិនជាអធិការកិច្ចសម្រេចបិទបញ្ចប់នូវដំណើរការនៃការធ្វើអធិការកិច្ច មាននូវសេចក្តីសម្រេចមួយ អ៊ីចឹងអធិការកិច្ចការងារ គាត់មិនអាចបញ្ជូននូវសំណុំរឿងឬក៏ការទាមទាររបស់កម្មករនិយោជិតហ្នឹងទៅក្រុមប្រឹក្សាអាជ្ញាកណ្តាលបានទេ។ អ៊ីចឹងវាធ្វើឱ្យខាតប្រយោជន៍កម្មករនិយោជិតដែលជាដើមបណ្តឹងក្នុងការទាមទារ»។
ប្រភពដដែលបន្តថា ការអនុវត្តនីតិវិធីបែបនេះ គួរតែមានការបកស្រាយនិងកំណែទម្រង់ ដើម្បីកុំឱ្យប៉ះពាល់ដល់ដំណើរការដោះស្រាយវិវាទដទៃទៀត។ លោកបានចាត់ទុកការបញ្ឈប់បុគ្គលិកថ្នាក់ដឹកនាំសហជីព និងតំណាងបុគ្គលិកដែលមានការការពារពិសេសពីច្បាប់ ថាជាទម្រង់នៃការរើសអើងធ្ងន់ធ្ងរមួយ និងជាគំរូមិនល្អសម្រាប់ក្រុមហ៊ុនសហគ្រាសដទៃ ប្រសិនបើពួកគេមិនមានប្រព្រឹត្តកំហុសឆ្គងធ្ងន់ធ្ងរ។
លោកថា៖ «វាជាគំរូអាក្រក់មួយដែលថា ប្រសិនជាណាហ្គាហ្នឹងអាចបញ្ឈប់ថ្នាក់ដឹកនាំសហជីពបាន អាចបញ្ឈប់ប្រតិភូបុគ្គលិកបាន អ៊ីចឹងច្បាប់យើងហ្នឹងបង្កើតឡើង ដើម្បីឱ្យមានការការពារសិទ្ធិរបស់ថ្នាក់ដឹកនាំសហជីព ហើយនិងតំណាងកម្មករនិយោជិត ប្រតិភូបុគ្គលិក ធ្វើអី? អ៊ីចឹងមានន័យថាម៉េច? មានន័យថា និយោជកគាត់ចេះអនុវត្តអ៊ីចឹងទៅ បានទៅ នៅកន្លែងការងារផ្សេង ក្រុមហ៊ុនផ្សេងហ្នឹង គេអាចអនុវត្តដូចគ្នា»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ សោកស្តាយចំពោះការសម្រេចរបស់ក្រុមប្រឹក្សាអាជ្ញាកណ្តាល ដោយចាត់ទុកការសម្រេចនេះថាជាការមិនបំពេញតួនាទីរបស់ខ្លួន និងនាំឱ្យដំណើរការនីតិវិធីផ្សះផ្សាវិវាទកាន់តែស្មុគស្មាញ និងអូសបន្លាយពេលយូរ។
កញ្ញា ស៊ីថរ ថ្លែងថា៖ «មុនពេលដែលរឿងហ្នឹងទៅដល់ក្រុមប្រឹក្សាអាជ្ញាកណ្តាល គឺត្រូវបានដោះស្រាយនៅក្រសួងការងារ ហើយអធិការកិច្ចការងារ គឺជាអ្នកចូលរួមផ្សះផ្សារឿងហ្នឹង ហើយមិនផ្សះជាបាន គេបញ្ជូនសំណុំរឿងហ្នឹងដែលជាវិវាទរួមហ្នឹងទៅអាជ្ញាកណ្តាល។ អ៊ីចឹងទៅដល់អាជ្ញាកណ្តាល អាជ្ញាកណ្តាលត្រូវកាត់សេចក្តី ប៉ុន្តែបែរជាទៅបករុញថយក្រោយវិញ។ វាហាក់បីជារុញទៅរុញមក ហើយព្យាយាមពន្យារពេលរកដំណោះស្រាយសម្រាប់កម្មករ។ អ៊ីចឹងកាលណាយើងពន្យារពេលក្នុងការរកដំណោះស្រាយដល់ពួកគាត់ បានន័យថា បញ្ហាហ្នឹងវាអត់ត្រូវបានដោះស្រាយ»។
ថ្នាក់ដឹកនាំសហជីពរូបនេះបន្ថែមថា ខាងសហជីពនឹងប្រជុំជាមួយសមាជិកនិងបុគ្គលិកកម្មករដែលត្រូវក្រុមហ៊ុនបញ្ឈប់ពីការងារ ដើម្បីសម្រេចជ្រើសរើសនីតិវិធីបន្តកូដកម្ម ឬប្តឹងទៅតុលាការនាពេលឆាប់ៗខាងមុខ។
វីអូឌី មិនអាចទាក់ទងសុំការអធិប្បាយពីអនុប្រធាននាយកដ្ឋានវិវាទការងារ លោក ខៀវ សាវុធ ជុំវិញករណីនេះបានទេ នៅថ្ងៃនេះ។
យ៉ាងណា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ លើកឡើងយ៉ាងខ្លីតាមតេឡេក្រាមថា មន្រ្តីអង្គភាពពាក់ព័ន្ធកំពុងដំណើរការនីតិវិធីផ្សះផ្សាវិវាទរវាងកម្មករនិយោជិតនិងនិយោជកនៅក្រុមហ៊ុន ណាហ្គាវើលដ៍។
លោកថា៖ «ករណីវិវាទនេះ គឺអង្គភាពមានសមត្ថកិច្ចកំពុងបន្តដោះស្រាយទៅតាមនីតិវិធីនិងច្បាប់»។
កាលពីខែមិថុនា ឆ្នាំ២០២១ សហជីពទ្រទ្រង់សិទ្ធិបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ ប្រមូលបានស្នាមមេដៃជាង២ ០០០ ដើម្បីដាក់ញាត្តិទៅក្រសួងការងារ ដោយទាមទារឱ្យក្រុមហ៊ុន ណាហ្គាវើលដ៍ ទម្លាក់ចោលផែនការរំសាយបុគ្គលិកទ្រង់ទ្រាយធំជាង១ ០០០នាក់ ដែលមានរាប់ទាំងថ្នាក់ដឹកនាំ និងសកម្មជនសហជីពទាំងអស់ និងទូទាត់ប្រាក់ដំណាច់អតីតភាព និងប្រាក់អត្ថប្រយោជន៍ផ្សេងៗជូនបុគ្គលិកនិយោជិតឱ្យបានត្រឹមត្រូវតាមច្បាប់។
ក្រុមហ៊ុន ណាហ្គាវើលដ៍ បានចាប់ដំណើរការបញ្ឈប់បុគ្គលិកចំនួន១ ៣២៩នាក់ ចាប់ពីថ្ងៃទី១៧ ខែឧសភា ឆ្នាំ២០២១ បន្ទាប់ពីប្រកាសកាលពីខែមេសា ក្រោមហេតុផលដើម្បីរក្សាស្ថិរភាពអាជីវកម្មដែលរងផលប៉ះពាល់ដោយសារជំងឺកូវីដ-១៩ និងការផ្អាកប្រតិបត្តិការអាជីវកម្មបណ្តោះអាសន្ននៅក្នុងឆ្នាំ២០២០ និងចាប់ពីខែមីនា ឆ្នាំ២០២១៕
