ពលរដ្ឋម្នាក់អាយុ៤៥ ឆ្នាំ រស់នៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ បានដាក់ពាក្យបណ្ដឹងទៅតុលាការ ដោយប្ដឹងប្រធានគណបក្សសម្ព័ន្ធដើម្បីប្រជាធិតេយ្យ លោក ខឹម វាសនា ពីបទជេរប្រមាថជាសាធារណៈនិងមើលងាយពូជសាសន៍ខ្មែរ។
ក្នុងពាក្យបណ្ដឹងចុះថ្ងៃទី១២ ខែមិថុនា ឆ្នាំ២០១៧ ដែលដាក់ទៅព្រះរាជអាជ្ញានៃអយ្យការអមសាលាដំបូងរាជធានីភ្នំពេញឲ្យដឹងថា កាលពីថ្ងៃទី១២ ខែកុម្ភៈ ឆ្នាំ២០១៧ នៅក្នុងវេទិកាជួបជុំគ្នារបស់លោក ខឹម វាសនា បានជេរប្រមាថជាសាធារណៈ ហើយការជេរប្រមាថនេះត្រូវផ្សព្វផ្សាយតាមបណ្ដាញសង្គមហ្វេសប៊ុកផងដែរ។
លោក សុច សឿង ជាម្ចាស់បណ្តឹងបញ្ជាក់បន្ថែមថា លោកដាក់ពាក្យប្ដឹងទៅតុលាការនេះ ដោយសារលោក ខឹម វាសនា បានជេរប្រមាថ មើលងាយពូជសាសន៍ខ្មែរ ហើយប្រើពាក្យអសុរសជាច្រើននេះ បានធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូររបស់ប្រទេសជាតិ។
លោក សុច សឿង បន្តថា លោកក៏បានដាក់ពាក្យបណ្ដឹងមួយទៀតទៅស្ថាប័នព្រះមហាក្សត្រដើម្បីឲ្យជួយអន្តរាគមន៍ ទប់ស្កាត់នូវសកម្មភាពរបស់អ្នកនយោបាយរូបនេះផងដែរ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា មានប្រសាសន៍ថា លោកកំពុងជាប់រវល់ប្រជុំ ដោយលោកឲ្យផ្ញើសារទៅ ប៉ុន្តែកាលពីថ្ងៃទី១៤ ម្សិលវីអូឌីបានផ្ញើសារទៅហើយមកដល់ថ្ងៃនេះលោកមិនបានឆ្លើយតបមកវិញនៅឡើយ។
ពាក់ព័ន្ធរឿងនេះ VOD មិនអាចទាក់ទង លោក ខឹម វាសនា និងលោក កូវ គា អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យបាននៅឡើយទេ៕