រដ្ឋមន្ត្រីក្រសួងមហាផ្ទៃ ណែនាំមន្ត្រីក្រោមបង្គាប់នៅតាមស្ថាប័ននានាឲ្យពង្រឹងការផ្តល់សេវាសាធារណៈដល់ប្រជាពលរដ្ឋ ដើម្បីកាត់បន្ថយភាពក្រីក្រ។
លោក ស ខេង បានថ្លែងបែបនេះ នៅចំពោះមុខមន្ត្រីរដ្ឋបាលថ្នាក់ជាតិនិងថ្នាក់ក្រោមជាតិ ប្រមាណជាង២៧០០នាក់ ក្នុងសន្និសីទជាតិស្តីពី «កំណែទម្រង់វិមជ្ឈការ និងវិសហមជ្ឈការ និងមេរៀនបទពិសោធន៍ បញ្ហាប្រឈម រួមទាំងចក្ខុវិស័យទៅអនាគត» នាព្រឹកថ្ងៃទី២១ ខែកុម្ភៈនេះ។
លោកថ្លែងដូចនេះថា «ក្នុងនាមរដ្ឋាភិបាល និងក្នុងនាម គ.ជ.អ.ប ខ្ញុំសូមជំរុញលើកទឹកចិត្តក្រសួង ស្ថាប័ន និងអ្នកពាក់ព័ន្ធទាំងអស់ ត្រូវប្រើប្រាស់កាឡានុវន្តភាពទាំងនេះ រួមគ្នាដោះស្រាយបញ្ហាប្រឈមនានា ដើម្បីបង្កើនតួនាទីរបស់រដ្ឋបាលថ្នាក់ក្រោមជាតិ និងការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន និងបន្តអនុវត្តកម្មវិធី និងគម្រោងនានា ដើម្បីបង្ហាញឲ្យឃើញពីផលប្រយោជន៍ជាក់ស្តែង ជូនប្រជាពលរដ្ឋ»។
ស្ថាប័នទាំងនោះរួមមាន ក្រុមការងារបច្ចេកទេសវិមជ្ឈការ និងវិសហមជ្ឈការ អគ្គនាយកនៃអគ្គនាយកដ្ឋានពាក់ព័ន្ធនានារបស់ក្រសួង ស្ថាប័ន ប្រធានក្រុមប្រឹក្សា អភិបាលរាជធានី ខេត្ត និងតំណាងស្ថានទូត ដៃគូអភិវឌ្ឍន៍ រួមទាំងអង្គការសង្គមស៊ីវិលពាក់ព័ន្ធនានាជាដើម។
បើតាមការកំណត់និយមន័យទូទៅ ការធ្វើវិមជ្ឈការ និងវិសហមជ្ឈការ មានន័យថា រដ្ឋាភិបាល ត្រូវប្រគល់មុខងារនិងសិទ្ធិអំណាច ទៅថ្នាក់ក្រោមជាតិ ដើម្បីធ្វើសកម្មភាពឲ្យបានរហ័សឆ្លើយតបទៅនិងតម្រូវការរបស់ពលរដ្ឋមូលដ្ឋាន។
ក្នុងសេចក្តីប្រកាសព័ត៌មានស្តីពី «កំណែទម្រង់វិមជ្ឈការ និងវិសហមជ្ឈការ» ឲ្យដឹងថា ជិត២ទស្សវត្សរ៍កន្លងមកនេះ រដ្ឋាភិបាលបានផ្ទេរថវិកាជាង២០ ០០លានដុល្លារ ទៅថ្នាក់ក្រោមជាតិ ដើម្បីអនុវត្តការងារផ្តល់សេវាសាធារណៈ និងអភិវឌ្ឍមូលដ្ឋានរួមមាន ធ្វើផ្លូវ ប្រឡាយ លូទឹក ប្រព័ន្ធផ្គត់ផ្គង់ទឹកស្អាត បង្គន់ ស្ពាន សាលារៀន មន្ទីរពេទ្យ និងអគារសុខាភិបាល ជាដើម។
សេចក្តីប្រកាសដដែលបញ្ជាក់ថា កំណែទម្រង់នេះ មានការអភិវឌ្ឍទៅមុខជាលំដាប់ ស្របតាមដំណាក់កាលនីមួយៗ ហើយកំពុងឈានដល់ដំណាក់កាលស៊ីជម្រៅ និងកាន់តែសាំញាំទាំងក្នុងកិច្ចការនយោបាយ និងផ្នែកបច្ចេកទេស ដែលទាមទារឲ្យបន្តពង្រឹងការប្តេជ្ញាចិត្តខាងនយោបាយក្នុងរាជរដ្ឋាភិបាលទាំងមូល ដោយថាដើម្បីធានាឲ្យប្រព័ន្ធគ្រប់គ្រងរដ្ឋបាលថ្នាក់ក្រោមជាតិកាន់តែមានប្រសិទ្ធភាព។
ប្រធានលេខាធិការដ្ឋាន គ.ជ.អ.ប លោក សក់ សេដ្ឋា បានថ្លែងនៅក្នុងសន្និសីទនោះដែរថា ការអនុវត្តរបស់មន្ត្រីថ្នាក់ក្រោមជាតិក្នុងការផ្តល់សេវាសាធារណៈនៅតែជួបបញ្ហាប្រឈម ក្នុងការបែងចែកមុខងារនៅតាមឃុំ សង្កាត់ ខេត្ត ការអនុវត្តសិទ្ធិអំណាច ការមិនចុះសម្រុងគ្នាពេលអនុវត្តការងារ ការធ្វើលិខិតបទដ្ឋាននានារៀបចំមិនស្របតាមប្រព័ន្ធវិមជ្ឈការ និងការចុះធ្វើអធិការកិច្ចជាដើម។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ ហាក់មិនមានជំនឿ លើវិធានការរបស់រដ្ឋាភិបាលក្នុងការជំរុញឲ្យមន្ត្រីថ្នាក់ក្រោមជាតិអនុវត្ត និងផ្តល់សេវាសាធារណៈជូនប្រជាពលរដ្ឋឲ្យមានប្រសិទ្ធិភាពលឿននោះទេ ដោយលោកថា ដំណើរវិមជ្ឈការ ហាក់នៅទើរពាក់កណ្តាលទី បន្ទាប់ពីអតីតបក្សសង្គ្រោះជាតិត្រូវបានរំលាយចោលកាលពីពាក់កណ្តាល ខែវិច្ឆិកា ឆ្នាំមុន ហើយអាសនៈក្រុមប្រឹក្សាឃុំសង្កាត់របស់បក្សប្រឆាំង៥០០០ជាង ត្រូវបាន គ.ជ.ប ដកហូតយក បែងចែកឲ្យបក្សនយោបាយផ្សេងៗជាដើម។
លោកថា «ដំណើរវិមជ្ឈការហាក់បានទើនៅកណ្តាលទី ដោយតែតំណាងប្រជាពលរដ្ឋនៅតាមមូលដ្ឋាន ត្រូវបានគេដកហូតកៅអី ក្រោយពេលដែលអតីតមន្ត្រីបក្សសង្គ្រោះជាតិត្រូវបានរំលាយដោយតុលាការ កំពូល ខ្ញុំមើលឃើញថា ឧបសគ្គធំមួយគឺទិដ្ឋភាពនយោបាយនៅកម្ពុជាដែលនាំឲ្យខាតបង់ ឬក៏ខូចខាតសម្រាប់ប្រយោជន៍វិមជ្ឈការនៅកម្ពុជាដែរ»។
លោក សន ជ័យ ផ្តល់អនុសាសន៍ថា ដើម្បីជំរុញយន្តការអភិវឌ្ឍន៍បែបប្រជាធិតេយ្យនៅថ្នាក់ក្រោមជាតិ ឲ្យមានប្រសិទ្ធភាព រដ្ឋាភិបាល ត្រូវពង្រឹងការអនុវត្តច្បាប់ស្ដីពីការគ្រប់គ្រងរដ្ឋបាល ខេត្ត ក្រុង ស្រុក ខណ្ឌ ហើយនិងច្បាប់ ស្ដីពីការគ្រប់គ្រងរដ្ឋបាលឃុំសង្កាត់ និងរៀបចំគោលនយោបាយច្បាស់លាស់ ដែលមានការចូលរួមពីមន្ត្រី ថ្នាក់មូលដ្ឋាន ហើយត្រូវដាក់ទោសទណ្ឌ ទៅលើមន្ត្រីទាំងឡាយណា ដែលយឺតយ៉ាវនៅក្នុងការផ្ទេរភារកិច្ចរបស់ខ្លួនផងដែរ៕