ក្រសួងធនធានទឹកនិងឧតុនិយម អំពាវនាវទៅប្រជាពលរដ្ឋទាំងអស់ ជាពិសេសអ្នករស់នៅជាប់មាត់សមុទ្រត្រូវបង្កើនការប្រុងប្រយ័ត្ន ដោយសារ នៅថ្ងៃទី១៧ ខែសីហា ខាងមុខនេះ កម្ពុជានឹងទទួលរងឥទ្ធិពលព្យុះទី១៦ ដែលធ្វើឲ្យតំបន់ជាប់មាត់សមុទ្រមានភ្លៀងធ្លាក់ច្រើន និងមានខ្យល់បក់បោកខ្លាំង។
សេចក្ដីប្រកាសព័ត៌មានរបស់ក្រសួងធនធានទឹកនិងឧតុនិយមចេញផ្សាយកាលពីថ្ងៃទី១៣ ខែសីហា បានអំពាវនាវទៅសាធារណជន ជាពិសេសប្រជានេសាទដែលធ្វើដំណើរតាមសមុទ្របង្កើនការប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗដោយយថាហេតុ។
តាមប្រភពដដែល កម្ពុជានឹងទទួលរងឥទ្ធិពលព្យុះទី១៦ ចាប់ពីថ្ងៃទី១៧ រហូតដល់ថ្ងៃទី១៨ ខែសីហា ខាងមុខនេះ ក្នុងនោះតំបន់មាត់សមុទ្រ ពិសេសខេត្តកោះកុង និងខេត្តព្រះសីហនុ នឹងមានបន្តភ្លៀងធ្លាក់ច្រើននិងខ្យល់បក់បោកខ្លាំងនិងរលកខ្ពស់ៗផងដែរ៕