អ្នកឃ្លាំមើលសង្គមមួយចំនួនព្រួយបារម្ភថា កត្តាអត់ការងារធ្វើដោយសារការវាយលុកនៃមេរោគរលាកផ្លូវដង្ហើមថ្មី ហៅ កូវីដ១៩ នឹងបង្កជាវិបត្តិសង្គម បើរដ្ឋាភិបាលមិនជំរុញល្បឿនដោះស្រាយបញ្ហាបំណុលរបស់អ្នកដែលរងផលប៉ះពាល់ ។

ថ្នាក់ដឹកនាំសហជីព និងបក្សនយោបាយមួយចំនួន​ បានអំពាវនាវឱ្យ​រដ្ឋាភិបាលជួយដោះស្រាយ​បញ្ហាប្រឈម​របស់កម្មករ​ ឬពលរដ្ឋដែលរងគ្រោះបាត់បង់ការងារធ្វើ ដោយត្រូវអន្តរាគមន៍ទៅគ្រឹះស្ថាន ឬធនាគារឯកជន​ឱ្យពន្យារពេលបង់ប្រាក់ ឬបន្ធូរបន្ថយការប្រាក់ ក្នុងស្ថានភាពជំងឺកូវីដ-១៩ កំពុងរីករាលដាល។