យុវជនម្នាក់ដែលទើបចេញមុខបង្កើតគណបក្សថ្មីមួយបានស្នើសុំជួបសួរសុខទុក្ខសកម្មជនគណបក្សសង្រ្គោះជាតិនៅថ្ងៃទី២៣ខែកុម្ភៈដែលកំពុងជាប់ពន្ធនាគារ។
ក្នុងលិខិតរបស់ប្រធានគណបក្សយុវជនកម្ពុជាចុះថ្ងៃទី១៨ខែកុម្ភៈលោក ពេជ្រ ស្រស់ បានស្នើសុំអនុញ្ញាតពីរដ្ឋមន្រ្តីក្រសួងមហាផ្ទៃលោក ស ខេង ដើម្បីបានជួបសួរសុខទុក្ខសកម្មជនគណបក្សសង្រ្គោះជាតិជាង១០រូបរាប់ទាំងលោក មាជ សុវណ្ណរ៉ា និងលោក ហុង សុខហួ ជាអតីតសមាជិកព្រឹទ្ធសភា។
ក្នុងលិខិតនោះលោក ពេជ្រ ស្រស់ បានអះអាងប្រាប់លោក ស ខេង ថាមូលហេតុដែលលោកចង់ជួបសកម្មជនគណបក្សប្រឆាំងព្រោះថ្នាក់ដឹកនាំគណបក្សថ្មីនេះភាគច្រើនជាយុវជន ហើយពួកគេចង់បង្ហាញថាពីកម្លាំងក្លាំងក្លារបស់យុវជនដើម្បីស្វែងយល់ពីទឹកចិត្តអ្នកនយោបាយដូចគ្នា។
អនុប្រធានគណបក្សយុវជនកម្ពុជាលោក អ៊ុន វិសិទ្ធគុន បានបញ្ជាក់បន្ថែមថាការដែលក្រុមលោកចង់ជួបសកម្មជនគណបក្សសង្រ្គោះជាតិនោះមិនមែនចង់ទាក់ទាញការគាំទ្រពីគណបក្សប្រឆាំងនេះនោះទេ។
លោកអះអាងថា៖ ” អីចឹងការសួរសុខទុក្ខហ្នឹងមិនមែនខ្ញុំចូលទៅចាប់ដៃឬលួងលោមគាត់ឲ្យគាត់មកចូលរួមនឹងគណបក្សយុវជនកម្ពុជាយើងទេគឺគ្រាន់ថាក្នុងន័យមួយខ្ញុំចង់ដឹងពីសុខទុក្ខគាត់មិនប្រកាន់ថាអ្នកនយោបាយមកពីគណបក្សណានោះទេ”។
មន្រ្តីជាន់ខ្ពស់គណបក្សសង្រ្គោះជាតិលោក អេង ឆៃអ៊ាង បានស្វាគមន៍ចំពោះគម្រោងជួបសួរសុខទុក្ខសកម្មជនគណបក្សរបស់លោកនេះដោយលោកមិនបារម្ភថាគណបក្សថ្មីនេះអាចស្រូបយកសំឡេងពីគណបក្សសង្រ្គោះជាតិបាននោះទេ។
លោកមានប្រសាសន៍ថា៖ ”យើងសប្បាយរីករាយបើមានបងប្អូនយើងប្រជាពលរដ្ឋណាដែលមានទឹកចិត្តឈឺឆ្អាលស្រលាញ់យុត្តិធម៌ចង់ទៅសួរសុខទុក្ខសកម្មជនគណបក្សសង្រ្គោះជាតិដែលកំពុងជាប់ពន្ធនាគារទាំងអស់ហ្នឹង គណបក្សសង្រ្គោះជាតិស្វាគមន៍”។
VOD មិនអាចទាក់ទងអ្នកនាំពាក្យក្រសួងមហាផ្ទៃលោក ខៀវ សុភ័គ បាននៅឡើយនៅព្រឹកថ្ងៃព្រហស្បតិ៍នេះ។
សូមបញ្ជាក់ថាគណបក្សយុវជនកម្ពុជាទើបតែដាក់ពាក្យសុំបង្កើតគណបក្សថ្មីនេះទៅក្រសួងមហាផ្ទៃ៕
