គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប ប្រកាសតែងតាំងអគ្គលេខាធិការ និងអគ្គលេខាធិការរង ព្រមទាំងមន្ត្រីរបស់ខ្លួនមួយចំនួនទៀតជាផ្លូវការឲ្យចូលបម្រើការងារនៅតាមផ្នែកផ្សេងៗនៃ គ.ជ.ប។
ពិធីប្រកាសតែងតាំងអគ្គលេខាធិការ អគ្គលេខាធិការរង និងមន្ត្រីផ្សេងទៀតរបស់ គ.ជ.ប នេះធ្វើឡើងនៅព្រឹកថ្ងៃអង្គារនេះ នៅមជ្ឈមណ្ឌលកុំព្យូទ័រនៃ គ.ជ.ប។
យោងតាមព្រះរាជក្រិត្យចុះថ្ងៃទី២៨ ខែមករា លោក ទេព នីថា ត្រូវបានតែងតាំងជាអគ្គលេខាធិការ គ.ជ.ប មានឋានៈ និងបុព្វសិទ្ធិស្នើនឹងរដ្ឋលេខាធិការ ចំណែកលោក ម៉ៅ សុភារិទ្ធ លោក សោម សូរីដា លោក នី ចរិយា និងលោក ម៉ុក ដារ៉ា ត្រូវបានតែងតាំងជាអគ្គលេខាធិការរង គ.ជ.ប មានឋានៈ និងបុព្វសិទ្ធិស្មើនឹងអនុរដ្ឋលេខាធិការ។
ក្នុងពិធីនៅព្រឹកនេះ គ.ជ.ប ក៏ប្រកាសតែងតាំងជំនួយការសមាជិក គ.ជ.ប ទាំង៩នាក់ ប្រធាន អនុប្រធាននាយកដ្ឋាន ប្រធាន អនុប្រធានលេខាធិការដ្ឋាននៃអគ្គលេខាធិការដ្ឋាន គ.ជ.ប ប្រធាន និងអនុប្រធានការិយាល័យ និងប្រធាន អនុប្រធានលេខាធិការដ្ឋានរាជធានីខេត្តរៀបចំបោះឆ្នោត ឲ្យចូលកាន់តំណែង និងផ្ទេរបញ្ចូលក្របខណ្ឌជាមន្ត្រីរាជការនៃ គ.ជ.ប ផងដែរ។ ក្នុងនោះប្រធានសហព័ន្ធនិស្សិតបញ្ញវន្តកម្ពុជា លោក ម៉ៅ ពិសេស ដែលសកម្មក្នុងការតវ៉ាទាមទារឲ្យអតីតអ្នកនាំពាក្យស្ថានទូតវៀតណាមប្រចាំកម្ពុជាសុំទោសសម្រាប់ការថ្លែងពាក់ព័ន្ធនឹងទឹកដីកម្ពុជាក្រោមនោះ ត្រូវបានតែងតាំងជាអនុប្រធាននាយកដ្ឋានបណ្ដុះបណ្ដាល និងអប់រំអ្នកបោះឆ្នោត។
គួរបញ្ជាក់ថា កាលពីថ្ងៃទី១៥ ខែមករា លោក ទេព នីថា ជាអគ្គលេខាធិការ គ.ជ.ប ចាស់ត្រូវបានជ្រើសរើសជាអគ្គលេខាធិការ គ.ជ.ប ថ្មី ឯលោកម៉ៅ សុភារិទ្ធ លោក សោម សូរីដា លោក នី ចរិយា និងលោក ម៉ុក ដារ៉ា ត្រូវបានជ្រើសរើសជាអគ្គលេខាធិការរង៕
