ក្រសួងមហាផ្ទៃបញ្ជាឲ្យមន្ត្រី បន្តធ្វើអត្តសញ្ញាណប័ណ្ណជូនពលរដ្ឋក្នុងអំឡុងបុណ្យចូលឆ្នាំខ្មែរ ដោយអះអាងថា ជាការបង្កលក្ខណងាយស្រួលដល់ពលរដ្ឋចំណាកស្រុកពេលពួកគេវិលត្រឡប់ទៅលេងស្រុកកំណើត ក្នុងពិធីបុណ្យប្រពីណៃជាតិខ្មែរ។
ពិធីបុណ្យចូលឆ្នាំខ្មែរ នឹងប្រព្រឹត្តិទៅចាប់ពីថ្ងៃទី១៣ ដល់ថ្ងៃទី១៦ ខែមេសាខាងមុខ។
សេចក្តីណែនាំរបស់អគ្គស្នងការដ្ឋាននគរបាលជាតិ ចុះថ្ងៃទី០១ ខែ មេសា បានសរសេរថា កន្លងទៅស្ថាប័នជំនាញមួយនេះ រកឃើញថា ចំនួនប្រជាពលរដ្ឋដែលធ្វើអត្តសញ្ញាណប័ណ្ណ មានការថយចុះដោយសារកត្តាចំណាកស្រុកមានចំនួនច្រើន។
សេចក្តីណែនាំបញ្ជាក់ថា ក្នុងឱកាសបុណ្យចូលឆ្នាំខាងមុខ ពលរដ្ឋចំណាកស្រុកទាំងនោះ ពួកគេនឹងវិលត្រឡប់មកស្រុកកំណើតរបស់ពួកគេវិញ ដើម្បីចូលរួមប្រារព្វពិធីបុណ្យចូលឆ្នាំនេះ។
ករណីនេះ អគ្គស្នងការដ្ឋាន បានបញ្ជាឲ្យស្នងការដ្ឋាននគរបាលរាជធានី-ខេត្ត ត្រូវរៀបចំឧបករណ៍សម្ភារៈចុះធ្វើអត្តសញ្ញាណប័ណ្ណ ជូនប្រជាពលរដ្ឋនៅតាមទីវត្តអារាម តាមផ្ទះ និងតំបន់ប្រជុំជននានា ដែលរដ្ឋាភិបាលថា ធ្វើបែបនេះ អាចជួយឲ្យពលរដ្ឋដែលចំណាកស្រុកទាំងនោះ មានអត្តសញ្ញាណប័ណ្ណប្រើប្រាស់បានគ្រប់ៗគ្នា។
សេចក្ដីណែនាំដដែលបញ្ជាក់ដែរថា ក្រៅពីនោះ ស្ថាប័នពាក់ព័ន្ធក៏មានវិធានការមួយចំនួនទៀត ដើម្បីពង្រឹងប្រសិទ្ធិភាពនៃការចុះធ្វើអត្តសញ្ញាណប័ណ្ណនេះ ដូចជាបង្កើនការផ្សព្វផ្សាយឲ្យមានការចូលរួមពីប្រជាពលរដ្ឋ។
ការពន្លឿនយន្តការផ្តល់អត្តសញ្ញាណប័ណ្ណសញ្ញាតិខ្មែរ និងចុះត្រួតពិនិត្យដល់ស្ថានីយ៍ចល័ត និងលើកទឹកចិត្តដល់មន្ត្រីដែលអនុវត្តផ្ទាល់។
សេចក្ដីណែនាំបន្ថែមថា បើករណីមានភាពរអាក់រអួលផ្នែកបច្ចេកទេសក្នុងការប្រមូល ឬបញ្ជូនទិន្ន ឬមានសំណូមពរផ្សេងៗ ពីប្រជាពលរដ្ឋ អគ្គស្នងការថា ត្រូវទំនាក់ទំនងផ្ទាល់មកនាយកដ្ឋានអត្តសញ្ញាណប័ណ្ណសញ្ញាតិខ្មែរ ដើម្បីសហការគ្នាដោះស្រាយឲ្យទាន់ពេលវេលាផងដែរ៕
