ក្រសួងបរិស្ថានបានអំពាវនាវដល់ប្រជាពលរដ្ឋនិងភ្ញៀវទេសចរណ៍ដែលអញ្ជើញទៅកំសាន្តនៅតំបន់ឆ្នេរសមុទ្រខេត្តកែប ត្រូវមានការប្រុងប្រយ័ត្ន ហើយផ្អាកចុះមុជទឹកសមុទ្រដែលមានស្លែ រហូតដល់ចុងសប្តាហ៍នេះ។
ក្នុងសេចក្តីប្រកាសព័ត៌មានចុះថ្ងៃទី០៤ ខែមេសា ក្រសួងបរិស្ថានបានបញ្ជាក់ថាតាមការសន្និដ្ឋានបឋម ការកើនឡើងនូវកម្រិតស្លែនៅក្នុងទឹកសមុទ្រ គឺបណ្តាលមកពីការកើនឡើងនូវសីតុណ្ហភាព ពន្លឺនិងការប្រែប្រួលនូវជីវជាតិចិញ្ចឹមនៅក្នុងទឹកសមុទ្រ។ លោកបន្តថាការហាមប្រាមមិនឲ្យចុះមុជទឹកសមុទ្រ ដើម្បីទុកឱកាសឲ្យមន្ត្រីជំនាញនិងអាជ្ញាធរខេត្តកែបធ្វើការបោសសម្អាតឆ្នេរឲ្យបានស្អាត។
ក្រសួងបរិស្ថានក៏បានបញ្ជាក់បន្ថែមថាបច្ចុប្បន្នជាទូទៅ ស្លែដែលបានកើតមានកើតមានឡើងនៅតំបន់ឆ្នេរសមុទ្រខេត្តកែបបានបាត់ទៅវិញស្ទើរតែទាំងស្រុង ហើយស្ថានភាពទឹកសមុទ្រមានភាពរងថ្លានិងឈានទៅរកភាពប្រក្រតីឡើងវិញ។ ចំពោះការនេសាទសមុទ្រនៅខេត្តកែប ក្រសួងបានណែនាំថាប្រជានេសាទអាចបន្តប្រកបរបររបស់ខ្លួនទៅតាមតំបន់ទឹកដែលមានរយៈចម្ងាយពីឆ្នេរប្រមាណ៥០០ម៉ែត្រឡើងទៅ៕