រដ្ឋមន្រ្តីក្រសួងមហាផ្ទៃ លោក ស ខេង នារសៀលនេះលើកឡើងថាក្រសួងនឹងសង់ផ្ទះសំណាក់ពន្ធនាគារដើម្បីបន្ថយភាពតានតឹងរបស់ទណ្ឌិតដែលគ្រួសារមានជីវភាពធូរធារ។
ក្នុងពិធីផ្ទេរតំណែងរបស់អគ្គនាយកពន្ធនាគារពីលោក គុយ ប៊ុនសន ទៅលោក ចាន់ គីមសេង លោក ស ខេង បានថ្លែងថាក្រុមហ៊ុនឯកជននឹងសាងសង់ផ្ទះសំណាក់ពន្ធនាគារនេះ ដោយសាររដ្ឋមិនមានលទ្ធភាពក្នុងការចំណាយការសាងសង់។ លោកបន្តថាផ្ទះសំណាក់ពន្ធនាគារដែលនឹងសាងសង់ក្រោយពិធីបុណ្យចូលឆ្នាំខ្មែរនេះនឹងជួយរួមចំណែកពង្រឹងសណ្តាប់ធ្នាប់សន្តិសុខ ការអប់រំ កែប្រែមនុស្សដើម្បីឈានទៅធ្វើសមាហរណកម្ម។
លោកមានប្រសាសន៍ថា៖ “ការឃុំខ្លួនបើយើងគ្រាន់តែយកទៅដាក់ខ្នោះដាក់គុក ដាក់ច្រវ៉ាក់គ្នាត្រឡប់ទៅវិញ សួរថាតើអ្នកហ្នឹងអាចកែប្រែបានទេ ចឹងបើក្រុមគ្រួសារមានលទ្ធភាពគេសុំការអនុញ្ញាតជាគោលការណ៍ដើម្បីនឹងគេចេញលុយបង់ បង់ថ្លៃហ្នឹងទៅ ទៅដេកក្នុងបន្ទប់១ ពីរនាក់ ឬម្នាក់តាមការជាក់ស្តែងអីចឹងទៅ ហើយបង់តិចតួចចឹងទៅ អាហ្នឹងយើងបន្ធូរបន្ថយដល់ការចំណាយថវិការបស់រដ្ឋដែរ ក្នុងន័យអ៊ីចឹងទេ គ្មានអីក្រៅពីហ្នឹងទេ។ តែក្រៅពីហ្នឹងត្រូវស្ថិតក្រោមគោលការណ៍ច្បាប់ពន្ធនាគារទាំងអស់ មិនមែនទៅនៅហ្នឹងអាចសេរីតាមចិត្តអីមិនមែនទេ ជាប់គុកនៅតែជាប់គុកចឹង”។
លោក ស ខេង បន្ថែមថា ការមានផ្ទះសំណាក់ពន្ធនាគារនឹងផ្តល់ប្រយោជន៍យ៉ាងច្រើនដល់អ្នកជាប់ឃុំ។ លោកមានប្រសាសន៍ថា៖ “ធ្វើឲ្យអារម្មណ៍គេវាមិនចង្អៀតចង្អល់ វាមិនស្មុគស្មាញ ហើយយើងអាចញែក ញែកអ្នកគ្រឿងញៀន ឧបមាថាឥឡវឪពុកម្តាយមានវិប្បដិសារីកូនគ្រឿងញៀនអីចឹងទៅ ចង់យកកូនដាក់មួយកន្លែងឥចឹងទៅ គេអាចមានលទ្ធភាពជួយព្យាបាលជួយអីតាមលទ្ធភាព”។
បើតាមលោក ស ខាង រហូតមកដល់ពេលនេះកម្ពុជាមានទណ្ឌិតដែលកំពុងជាប់ឃុំទូទាំងប្រទេសចំនួន១៩១៥០នាក់។ លោកបន្ថែមថាចំនួនទណ្ឌិតកើនឡើងជារៀងរាល់ឆ្នាំ ហើយធ្វើឲ្យចំនួនអ្នកជាប់ឃុំវិសមភាពយ៉ាងខ្លាំងជាមួយលទ្ធភាពផ្ទុក៕
