អ្នកនាំពាក្យរដ្ឋសភាចាត់ទុកការចាប់ខ្លួនតំណាងរាស្រ្តគណបក្សសង្រ្គោះជាតិមណ្ឌលសៀមរាប លោក អ៊ុំ សំអាន ជាករណីដូចគ្នានឹងករណីអតីតព្រឹទ្ធសភាគណបក្សសម រង្ស៊ី លោក ហុង សុខហួរ ដោយលោកចាត់ទុកថានេះជា”បទល្មើសជាក់ស្តែង”។
លោក អ៊ុំ សំអាន ដែលសកម្មនឹងបញ្ហាព្រំដែន ត្រូវបានចាប់ខ្លួននៅយប់រំលងអធ្រាត្រថ្ងៃអាទិត្យ ក្នុងខេត្តសៀមរាប ពាក់ព័ន្ធនឹងការចោទប្រកាន់រឿងប្រើប្រាស់ផែនទីក្លែងក្លាយ។ លោកបានចាកចេញពីប្រទេសអស់រយៈពេលជាង៧ខែ ហើយបានវិលត្រឡប់មកប្រទេសកម្ពុជាវិញកាលពីព្រឹកថ្ងៃអាទិត្យ។
អ្នកនាំពាក្យរដ្ឋសភា លោក ឡេង ប៉េងឡុង ប្រាប់វីអូឌីថាការចាប់ខ្លួនតំណាងរាស្រ្តបានលុះត្រាតែមានបទល្មើសជាក់ស្តែង។ លោកបានប្រៀបធៀបករណីលោក អ៊ុំ សំអាន ទៅនឹងករណីលោក ហុង សុខហួរ ដែលត្រូវបានរដ្ឋាភិបាលចាប់ខ្លួន ពាក់ព័ន្ធនឹងការចោទប្រកាន់រឿងប្រើប្រាស់ឯកសារក្លែងក្លាយ ទាក់ទងនឹងសន្ធិសញ្ញាព្រំដែនជាមួយវៀតណាម។ លោកបញ្ជាក់ថា៖ “អាហ្នឹងវាមានបទល្មើសជាក់ស្តែង ដូចលោក ហុង សុខហួរ អញ្ចឹង”។ លោកបន្ថែមថាអ្វីៗអាស្រ័យលើតុលាការ។
លោក ឡេង ប៉េងឡុង បន្តថារហូតមកដល់ពេលនេះ អាជ្ញាធរមិនទាន់ជូនដំណឹងមករដ្ឋសភានៅឡើយទេពីការចាប់ខ្លួននេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថាករណីលោក អ៊ុំ សំអាន ជាបទល្មើសជាក់ស្តែង ដោយលោកប្រៀបធៀបទៅនឹងករណីលោក ហុង សុខហួរ ផងដែរ។
អ្នកនាំពាក្យគណបក្សសង្រ្គោះជាតិ លោក យឹម សុវណ្ណ ចាត់ទុកការចាប់ខ្លួនតំណាងរាស្រ្តបក្សប្រឆាំងនេះជាការរំលោភទៅនឹងរដ្ឋធម្មនុញ្ញ។ លោកមានប្រសាសន៍ថា៖ “គាត់មានអភ័យឯកសិទ្ធិ គាត់នៅជាតំណាងរាស្រ្តគណបក្សសង្រ្គោះជាតិខេត្តសៀមរាប ហើយឥឡូវគណបក្សកាន់អំណាច គេចាប់ខ្លួនគាត់ អាហ្នឹងជាទង្វើផ្ទុយនឹងរដ្ឋធម្មនុញ្ញ ហើយរំលោភអភ័យឯកសិទ្ធិអ្នកតំណាងរាស្រ្ត”។
លោកចាត់ទុកការចាប់ខ្លួនលោក អ៊ុំ សំអាន ជាការព្រមានដល់សេរីភាពនៃការបញ្ចេញមតិលើបញ្ហាព្រំដែន។ លោកមានប្រសាសន៍ថា៖ “ខ្ញុំជឿថាទង្វើទាក់ទងនឹងរឿងទឹកដីនេះ គឺជាទង្វើស្នេហាជាតិ ជាឧត្តមគិតរបស់ប្រជាពលរដ្ឋខ្មែរម្នាក់ៗ គឺជាកាតព្វកិច្ចដែលអ្នកតំណាងរាស្រ្តត្រូវតែបញ្ចេញមតិ ខ្ញុំយល់ឃើញថាការចាប់ខ្លួននេះធ្វើឲ្យអ្នកដែលគិតគូរឿងបញ្ហាព្រំដែនមានការភ័យខ្លាច កាលណាតែប្រជាពលរដ្ឋមានការភ័យខ្លាច ប្រជាពលរដ្ឋនឹងមិនហ៊ានបញ្ចេញមតិ(ទាក់ទងនឹងបញ្ហាព្រំដែន)”។
មុនពេលចាប់ខ្លួន លោក អ៊ុំ សំអាន ប្រាប់វីអូឌីថាលោកមិនភ័យខ្លាចនឹងការចាប់ខ្លួននោះទេ។ កន្លងទៅ រដ្ឋាភិបាលព្រមានចាត់វិធានការផ្លូវច្បាប់ប្រឆាំងនឹងនិយាយថារដ្ឋាភិបាលប្រើប្រាស់ផែនទីក្លែងក្លាយ។ លោក អ៊ុំ សំអាន ត្រូវបានលើកឡើងថាជាមនុស្សម្នាក់អាចរដ្ឋាភិបាលចាត់វិធានការ។
លោក អ៊ុំ សំអាន ឲ្យដឹងទៀតថាលោកនឹងបន្តសិក្សាបញ្ហាព្រំដែនជាមួយប្រជាពលរដ្ឋខ្មែរនៅក្រៅប្រទេស ដោយលោកថាការងារនេះនឹងបញ្ចប់ក្រោយការបោះឆ្នោតឆ្នាំ២០១៨។ លោកបញ្ជាក់ថាលោកនឹងស្នើឲ្យមានការសើរើបញ្ហាព្រំដែនឡើងវិញ ប្រសិនបើគណបក្សសង្រ្គោះជាតិឈ្នះការបោះឆ្នោត។ លោកមានប្រសាសន៍ថា៖ “គ្រាន់តែសិក្សាពីបច្ចេកទេសទាក់ទងនឹងបញ្ហាព្រំដែននិងឯកសារផ្សេងៗដែលទាក់ទងនឹងបញ្ហា ដើម្បីត្រៀមខ្លួននៅពេលដែលគណបក្សឈ្នះឆ្នោតឆ្នាំ២០១៨ យើងនឹងអាចសើរើការបោះបង្គោលព្រំដេនជាមួយវៀតណាម”។ លោកបញ្ជាក់ថាឯកសារទាំងនោះ លោកបានមកពីក្នុងស្រុកនិងក្រៅស្រុក នៅពេលលោកស្នាក់នៅក្រៅប្រទេស រួមមានពីប្រទេសបារាំង សហរដ្ឋអាមេរិក បណ្ណាល័យសភាអាមេរិកនិងអង្គការសហប្រជាជាតិជាដើម។
គួរបញ្ជាក់ថាកន្លងទៅ ប្រធានគណៈកម្មាធិការកិច្ចការព្រំដែនកម្ពុជា លោក វ៉ា គឹមហុង បានអះអាងថាលោក អ៊ុំ សំអាន បានញុះញង់ឲ្យមានអស្ថិរភាពសង្គមនិងមិនអាចអត់ឱនបាននោះទេ៕
