អគ្គនាយកដ្ឋានគយនិងរដ្ឋាករកម្ពុជាបានឲ្យដឹងថាពិតជាមានកប៉ាល់ដឹកប្រេងក្នុងដែនសមុទ្រខ្មែរ តែថាកប៉ាល់នោះមិនមែនជាកប៉ាល់របស់ថៃដែលសង្ស័យថាលក់ប្រេងគេចពន្ធនោះទេ។
អគ្គនាយកដ្ឋានគយនិងរដ្ឋាករកម្ពុជាបានចេញសេចក្តីបំភ្លឺមួយ ក្រោយពីសារព័ត៌មានFresh News បានចុះផ្សាយថាមានកប៉ាល់ដឹកប្រេងថៃមួយចូលចតនៅសមុទ្រខ្មែរ ដោយសង្ស័យថាលក់ប្រេងគេចពន្ធ។ អគ្គនាយកដ្ឋានបញ្ជាក់ថាខ្លួនបានទៅត្រួតពិនិត្យហើយរកឃើញថាមិនមានការចែកចាយប្រេងខុសច្បាប់នោះទេ។
នៅក្នុងសេចក្ដីបំភ្លឺមួយចេញថ្ងៃទី២១ ខែមេសា អគ្គនាយកដ្ឋានគយនិងរដ្ឋាករកម្ពុជាបានឲ្យដឹងថាកប៉ាល់ដឹកប្រេងនោះទទួលការអនុញ្ញាតត្រឹមត្រូវក្នុងការចែកចាយប្រេងឲ្យក្រុមហ៊ុនLim Longដែលជាក្រុមហ៊ុនមានអាជ្ញាប័ណ្ណស្របច្បាប់ក្នុងការធ្វើអាជីវកម្មចែកចាយប្រេងឥន្ធនៈនៅកម្ពុជានិងបានបំពេញកាតព្វកិច្ចនិងអាករតាមច្បាប់ជាធរមាន។ សេចក្ដីបំភ្លឺបានបន្ដទៀតថាក្រៅពីក្រុមហ៊ុននេះ ក៏មានក្រុមហ៊ុនមួយទៀតបានទទួលការអនុញ្ញាតឲ្យចែកចាយប្រេងនៅក្នុងលំហរសមុទ្រកម្ពុជា ភូមិសាស្ដ្រដែនទឹកខេត្ដព្រះសីហនុ ហើយក៏បានបង់ពន្ធនិងអាករតាមច្បាប់ជាធរមានដូចគ្នាដែរ។
សេចក្តីបំភ្លឺបញ្ជាក់បន្ថែមថា៖ “អគ្គនាយកដ្ឋានគយនិងរដ្ឋាករកម្ពុជាទទួលស្គាល់ថានៅក្នុងផ្ទៃសមុទ្រដ៏ធំល្វឹងល្វើយជាភូមិសាស្ដ្រស្មុគស្មាញលំបាកក្នុងការគ្រប់គ្រងអនុវត្ដច្បាប់ស្ដីពីគយឲ្យបានល្អ១០០% ហើយម្យាងទៀតស្ថាប័នគយក៏ពុំទាន់មានមធ្យោបាយទំនើបនិងគ្រប់គ្រាន់នៅឡើយដែរសម្រាប់បំពេញការងារនៅក្នុងដែនសមុទ្រដ៏ធំនេះ ដែលជាហេតុនាំឲ្យឈ្មួញខិលខូចខ្លះប្រព្រឹត្ដអំពើររត់គេចពន្ធ”៕
