ព្រះសង្ឃប្រកាន់ជំហរតឹងរឹងជាង១ពាន់អង្គ បានប្រមូលផ្ដុំគ្នានៅជាយទីក្រុងយ៉ាំងហ្គូន សម្រាប់សន្និបាតអ្នកជាតិនិយមប្រចាំឆ្នាំ កាលពីថ្ងៃសៅរ៍ម្សិលមិញ ខណៈបណ្ដាញប្រឆាំងមូស្លីម សម្លឹងទៅរកឋានៈប្រហាក់ប្រហែលគ្នា នៅក្រោមរបបគ្រប់គ្រងស៊ីវិលថ្មីរបស់ប្រទេសភូមា។
ទីភ្នាក់ងារព័ត៌មាន AFP បានរាយការណ៍ថា ព្រះសង្ឃគ្រងស្បងជីពរ ដូនជី និងពុទ្ធសាសនិកដទៃទៀត បានជួបជុំគ្នានៅក្នុងវត្តអារាមមួយកន្លែងនៅភាគខាងជើងទីក្រុងយ៉ាំងហ្គូន ដើម្បីរំលឹកខួប៣ឆ្នាំ នៃការបង្កើតបណ្ដាញសង្ឃាជាតិនិយម ដែលជាចលនាប្រឆាំងនឹងមូស្លីមដ៏លេចធ្លោនៅប្រទេសភូមានៅក្នុងរយៈពេលប៉ុន្មានឆ្នាំមកនេះ។
បណ្ដាញព្រះសង្ឃនេះ បានបង្ហាញនូវកម្លាំងនយោបាយដ៏មានសក្ដានុពល នៅក្រោមរដ្ឋាភិបាលគាំទ្រដោយពួកអតីតយោធា ដែលបានបញ្ចុះបញ្ចូលឲ្យអនុម័តច្បាប់ចម្រូងចម្រាស់ជាច្រើន ដែលក្រុមសិទ្ធិមនុស្សនិយាយថា ច្បាប់ទាំងនោះរើសអើងប្រឆាំងស្ត្រី និងក្រុមជនជាតិភាគតិច។
ប៉ុន្តែ ក្រុមព្រះសង្ឃនេះ បានបាត់បង់ឥទ្ធិពលនៅក្នុងការបោះឆ្នោតកាលពីខែវិច្ឆិកាឆ្នាំមុន នៅពេលដែលគណបក្សរបស់សម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី អ៊ុង សាន ស៊ូជី បានទទួលជ័យជម្នះ និងកំពុងដឹកនាំប្រទេសមួយនេះ ដែលធ្លាប់ស្ថិតក្រោមរបបយោធាអស់កន្លះសតវត្សរ៍មកហើយនោះ។
តំណាងបណ្ដាញសង្ឃស្នេហាជាតិមកពីទូទាំងប្រទេសភូមា បានឡើងថ្លែងនៅក្នុងសន្និបាតរយៈពេល ២ថ្ងៃ ដែលពិនិត្យមើលលើជោគជ័យរបស់ពួកគេកាលពីឆ្នាំមុន និងលើកទិសដៅសម្រាប់អនាគត។
សារស័ព្ទជាច្រើនដែលមេដឹកនាំបណ្ដាព្រះសង្ឃនេះប្រើនោះ បានដៅទៅរកក្រុមជនជាតិភាគតិចរ៉ូហ៊ីងយ៉ាជានិច្ច ដែលមិនត្រូវបានគេផ្ដល់សិទ្ធិជាពលរដ្ឋនៅក្នុងប្រទេសភូមា និងបង្កើតឲ្យមានការរើសអើងបែបរបបអាផាថេត ចាប់តាំងពីមានកុប្បកម្មដ៏ឃោឃៅនៅទូទាំងរដ្ឋរ៉ាក់ឃីន នៅភាគខាងលិចប្រទេសកាលពីឆ្នាំ២០១២កន្លងមក។
ឧបសគ្គដ៏ធំមួយរបស់លោកស្រី ស៊ូជី គឺការគូសវាសដំណោះស្រាយសម្រាប់ពួករ៉ូហ៊ីងយ៉ា ដែលត្រូវបានក្រុមព្រះសង្ឃជាតិនិយមភូមា ចាត់ទុកជាក្រុមអន្តោប្រវេសន៍ខុសច្បាប់មកពីប្រទេសបង់ក្លាដែស បើទោះបីជាការពិតថា ជនជាតិរ៉ូហ៊ីងយ៉ាងជាច្រើន បានរស់នៅភូមារាប់ជំនាន់មកហើយក៏ដោយ៕
