តំណាងរាស្រ្តបក្សប្រឆាំងបានអះអាងថាការប្រមូលផ្តុំនៅមុខទីស្នាក់ការគណបក្សក្នុងសង្កាត់ចាក់អង្រែលើមិនចាំបាច់សុំច្បាប់ពីអាជ្ញាធរនោះទេ ហើយថាមន្រ្តីគណបក្សនឹងជួបជាមួយអាជ្ញាធរខណ្ឌ ដើម្បីសួរដេញដោលពីលិខិតរបស់អាជ្ញាធរ។
កាលពីថ្ងៃអង្គារ លោក ពេជ្រ កែវមុនី អភិបាលខណ្ឌមានជ័យ បានចេញលិខិតមួយដោយណែនាំឲ្យគណបក្សប្រឆាំងរក្សាសណ្តាប់ធ្នាប់សាធារណៈ សម្រួលការស្ទះចរាចរណ៍និងរុះរើសំយ៉ាបដែកស័ង្កសី ដែលបានសង់និងថាការជួបជុំត្រូវមានការអនុញ្ញាតពីសាលាក្រុង។
អ្នកនាំពាក្យគណបក្សសង្រ្គោះជាតិ លោក យ៉ែម បុញ្ញឫទ្ធិ ថ្លែងនៅទីស្នាក់ការគណបក្សនៅសង្កាត់ចាក់អង្រែលើថាការជួបក្នុងផ្ទះឬទីស្នាក់ការបក្សមិនចាំបាច់ត្រូវសុំច្បាប់ឬជូនដំណឹងនោះទេ។ លោកបន្តថាតំណាងរាស្រ្ត លោក ហូរ វ៉ាន់ នឹងទៅជួបជាមួយអាជ្ញាធរខណ្ឌមានជ័យដើម្បីសួរដេញដោលពីច្បាប់ទម្លាប់ទាំងនេះ។
បើតាមលិខិតរបស់អភិបាលខណ្ឌមានជ័យ រាល់សកម្មភាពចលនាកម្លាំងសកម្មជនមកប្រមូលផ្តុំនៅស្នាក់ការគណបក្សត្រូវស្នើសុំច្បាប់និងជូនដំណឹងដល់អាជ្ញាធរឲ្យបានត្រឹមត្រូវ ដោយកំណត់ចំនួនសមស្របនិងរយៈពេលមួយឲ្យបានច្បាស់លាស់។ អភិបាលខណ្ឌបានបញ្ជាក់ថា៖ “ធ្វើការររុះរើសំយ៉ាបដែកស័ង្កសីដែលសាងសង់ពុំមានច្បាប់អនុញ្ញាតពីអាជា្ញធរមានសមត្ថកិច្ច ចេញវិញទាំងអស់ក្នុងរយៈពេលមួយសប្តាហ៍ ដោយគិតចាប់ពីថ្ងៃជូនដំណឹងនេះតទៅ ក្នុងករណីពុំធ្វើការរុះរើតាមការកំណត់ទេ អាជ្ញាធរនិងអនុវត្តវិធានការរដ្ឋបាល “។
លោក យ៉ែម បុញ្ញឫទ្ធិ បានឲ្យដឹងទៀតថានឹងមានការប្រមូលផ្តុំរបស់អ្នកគាំទ្រនៅទីស្នាក់ការបក្សជាបន្តបន្ទាប់៕
