ក្រុមរដ្ឋមន្ត្រីការបរទេសមកពីបណ្ដាប្រទេសនៅតំបន់អាស៊ីអាគ្នេយ៍ នៅថ្ងៃអាទិត្យនេះ កំពុងជួបជុំគ្នានៅឯកិច្ចប្រជុំកំពូលរដ្ឋមន្ត្រីការបរទេសអាស៊ាន នៅប្រទេសឡាវ ហើយបញ្ហាសមុទ្រចិនខាងត្បូង នៅតែបន្តគ្របដណ្ដប់ទៅលើជំនួបកំពូលនេះដដែល។
ទីភ្នាក់ងារព័ត៌មាន AFP បានផ្សាយថា កិច្ចប្រជុំនៅទីក្រុងវៀងចន្ទន៍នេះ គឺជាជំនួបថ្នាក់តំបន់លើកដំបូងរបស់អាស៊ាន បន្ទាប់ពីតុលាការអន្តរជាតិមួយរបស់អង្គការសហប្រជាជាតិ បានសម្រេចនៅកាលពីថ្ងៃទី១២ ខែកក្កដាថា ប្រទេសចិនគ្មានសិទ្ធិទៅលើដែនទឹកដ៏ធំល្វឹងល្វើយនៅសមុទ្រចិនខាងត្បូងនោះឡើយ។
ក្រុមរដ្ឋមន្ត្រីការបរទេសអាស៊ាន ក៏គ្រោងជួបប្រជុំពិភាក្សាជាមួយរដ្ឋមន្ត្រីការបរទេសអាមេរិក លោក John Kerry និងរដ្ឋមន្ត្រីការបរទេសចិន លោក Wang Yi ផងដែរ នៅក្រៅជំនួបរបស់ពួកគេ។
នៅក្នុងចំណោមសមាជិកទាំង១០ នៃតំបន់អាស៊ាន ប្រទេសចំនួន ៤ កំពុងតែមានជម្លោះដែនទឹកជាមួយក្រុងប៉េកាំង ដែលបានអះអាងជាម្ចាស់លើដែនទឹកត្រួតស៊ីគ្នាដ៏ធំនៅសមុទ្រចិនខាងត្បូង ខណៈដែលប្រទេសចិននៅតែប្រកាន់ជំហរថា ជម្លោះដែនទឹកនោះ ត្រូវតែដោះស្រាយដោយទ្វេភាគី។
នៅប៉ុន្មានឆ្នាំមកនេះ អាស៊ានបានព្យាយាមបង្ហាញកម្លាំងរួមគ្នាប្រឆាំងនឹងចិន ខណៈដែលមានការចោទប្រកាន់ថា មហាអំណាចចិន បានបង្កើតសម្ព័ន្ធភាពជាមួយបណ្ដាប្រទេសតូចៗ ដូចជា កម្ពុជា និងឡាវ តាមរយៈការផ្ដល់ជំនួយ និងកម្ចីឥណទាន៕