ប្រទេសចំនួន២៤បានព្រមព្រៀងគ្នានៅថ្ងៃសុក្រនេះ ក្នុងការបង្កើតតំបន់អភិរក្សសត្វសមុទ្រធំបំផុតនៅលើពិភពលោក គឺបង្កើតឡើងនៅមហាសមុទ្រអង់តាក់ទិច ដែលគ្រប់ដណ្តប់លើផ្ទៃសមុទ្រ១,៥៥លានគីឡូម៉ែត្រការ៉េ។
គណៈកម្មការសម្រាប់ការអភិរក្សធនធានមានជីវិតនៅក្នុងសមុទ្រអង់តាក់ទិច បានជួបប្រជុំគ្នានៅក្នុងទីក្រុង ហូបាត នៃប្រទេសអូស្ត្រាលី នៅថ្ងៃសុក្រនេះបានសម្រេចថា តំបន់អភិរក្សឈ្មោះ Ross Sea នឹងត្រូវការពារមិនឲ្យមានការនេសាទរយៈពេល៣៥ឆ្នាំ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
Ross Sea គឺជាតំបន់សំខាន់នៅលើពិភពលោកសម្រាប់សត្វសមុទ្រ។ តំបន់នេះអភិរក្សសត្វសមុទ្រស្មើនឹងប្រមាណ១២%នៃសត្វសមុទ្រនៅមហាសមុទ្រខាងត្បូង មានសត្វជាង១០ ០០០ប្រភេទ រួមទាំងបក្សីអង់តាកទិច ត្រីបាឡែន មឹកយក្ស និងត្រីធ្មេញអង់តាក់ទិចជាដើម។
ប្រទេសរុស្ស៊ីក៏បានយល់ព្រមចំពោះគម្រោងនេះ ដែរ បន្ទាប់ពីការមិនយល់ព្រមចំពោះគម្រោងអភិរក្សសត្វសមុទ្រចំនួន៥គម្រោងមកនេះ៕
