មេប៉ូលិសឥណ្ឌូនេស៊ី បានព្រមានកាលពីថ្ងៃម្សិលមិញថា ក្រុមបាតុករអាចព្យាយាមសម្រុកចូលសភា ដើម្បីតវ៉ាប្រឆាំងទៅនឹងអភិបាលក្រុងហ្សាកាតា ដែលក្រុមបាតុករចោទថា បានប្រមាថមើលងាយដល់គម្ពីកូរ៉ាន់។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
បើតាម Reuters ប៉ូលិសបានប្រើប្រាស់ឧស្ម័នបង្ហូរទឹកភ្នែក និងបាញ់ទឹកកាលពីថ្ងៃទី៤ ខែវិច្ឆិកា ដើម្បីបំបែកក្រុមអ្នកតវ៉ាជាង ១សែននាក់ ដែលបានស្រែកទាមទារឲ្យអភិបាលក្រុងហ្សាកាតា លោក Basuki Tjahaja Purnama លាលែងពីតំណែង។ ប៉ុន្តែ អភិបាលក្រុងរូបនេះ បានបដិសេធមិនចុះចេញនោះឡើយ ហើយក៏បានថ្លែងសុំទោសចំពោះពាក្យសម្ដីរបស់លោករួចហើយដែរ។
លោក Purnama គ្រោងនឹងឈរឈ្មោះជាថ្មីសម្រាប់ការបោះឆ្នោតអភិបាលក្រុងហ្សាកាតានៅខែកុម្ភៈឆ្នាំក្រោយនេះ ហើយលោកនឹងត្រូវប្រជែងជាមួយបេក្ខជនមូស្លីម ២រូបទៀត។ ប៉ុន្តែ លោក Purnama គឺជាអភិបាលក្រុងកាន់សាសនាគ្រីស្ត។ តំណែងអភិបាលក្រុងហ្សាកាតា គឺជាតំណែងដ៏មានឥទ្ធិពល ហើយលោក Joko Widodo ក៏ធ្លាប់កាន់តំណែងជាអភិបាលក្រុងហ្សាកាតាផងដែរ មុននឹងក្លាយជាប្រធានាធិបតីកាលពីឆ្នាំ២០១៤៕
