មនុស្សចំនួន ២៩ បច្ចុប្បន្នជាបុគ្គលិក និងជាអតីតបុគ្គលិកនៃស្ថាប័នហិរញ្ញវត្ថុចំនួន ៥ ក្នុងនោះមានទាំងធនាគារចំនួន ៤ផងដែរ ត្រូវបានសមត្ថកិច្ចចាប់ខ្លួន ក្រោមការសង្ស័យថាប្រព្រឹត្តអំពើសូកប៉ាន់ ទាក់ទងនឹងការទម្លាយព័ត៌មានរបស់អតិថិជន។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីពីគណៈកម្មការឯករាជ្យប្រឆាំងអំពើពុករលួយ កាលពីថ្ងៃម្សិលមិញ។
ស្ថាប័នប្រឆាំងអំពើពុករលួយនេះ បាននិយាយនៅក្នុងសេចក្ដីប្រកាសព័ត៌មានមួយថា មនុស្សដែលត្រូវបានចាប់ខ្លួនទាំងអស់ ត្រូវបានគេដោះលែងឲ្យនៅក្រៅឃុំវិញ ហើយការស៊ើបអង្កេតកំពុងតែដំណើរការបន្ត ដោយស្ថាប័នហិរញ្ញវត្ថុទាំងអស់ បានយល់ព្រមសហការជាមួយស្ថាប័នប្រឆាំងអំពើពុករលួយ។
សេចក្ដីប្រកាសនេះ បានកើតឡើងបន្ទាប់ពីក្រុមហ៊ុន DBS Group Holdings បាននិយាយកាលពីថ្ងៃសុក្រសប្ដាហ៍មុនថា ខ្លួនសហការជាមួយអាជ្ញាធរហុងកុង ជុំវិញការលេចធ្លាយព័ត៌មានសម្ងាត់របស់អតិថិជន។ សារព័ត៌មានមួយរបស់ទីក្រុងហុងកុង បានរាយការណ៍ថា បុគ្គលិកធនាគារនេះ ត្រូវបានចាប់ខ្លួនពីបទសូកប៉ាន់ថ្នាក់លើ ដើម្បីទទួលបានព័ត៌មានផ្ទាល់ខ្លួនរបស់អតិថិជន៕