ប្រធានក្រុមប្រឹក្សាភិបាលក្រុមហ៊ុនឯកជនមួយ ជាជនបរទេសបានចោទថា ចៅក្រុមសាលារាជធានីភ្នំពេញនិង អង្គភាពប្រឆាំងអំពើពុករលួយ (ACU) ជម្រិតទារលុយពីក្រុមហ៊ុន៥០ម៉ឺនដុល្លារមិនបាន ទើបចាប់រូបលោកនិង សហការីរបស់លោក៥នាក់ទៀតដាក់ពន្ធនាគារ។
កាលពីថ្ងៃពុធម្សិលមិញ សាលាដំបូងរាជធានីភ្នំពេញបានសម្រេចផ្តន្ទាទោសលោក Gregg Thomas Fryett ជនជាតិអង់គ្លេស ជាប្រធានក្រុមប្រឹក្សាភិបាលក្រុម International Green Energy ឲ្យជាប់ពន្ធនាគារ៨ឆ្នាំ ពីបទបទក្លែងបន្លំអក្សរក្នុងឯកសារ បទសូកប៉ាន់ និងការកាប់រានដីព្រៃ ឈូសឆាយដីព្រៃ និងហ៊ុមព័ទ្ធដីព្រៃ ដោយខុសច្បាប់ក្នុងអំឡុងឆ្នាំ២០១០ដល់២០១២។ ចំណែកសហការីរបស់លោក៥នាក់ផ្សេងទៀត ជាជនជាតិខ្មែរ ត្រូវជាប់ទោសពី៣ទៅ១០ឆ្នាំ ពីបទចោទប្រកាន់ដូចគ្នានេះ។
លោក Gregg Thomas Fryett ថ្លែងក្រោយពេលស្តាប់សាលក្រមកាលម្សិលមិញថា អង្គភាពប្រឆាំងអំពើពុករលួយទារសំណូកចំនួន៣០ម៉ឺនដុល្លារ ចំណែកមន្ត្រីសាលាដំបូងរាជធានីភ្នំពេញទារ២០ម៉ឺនដុល្លារ តែក្រុមហ៊ុនលោកមិនព្រមឲ្យ ទើបឈានដល់ការឃុំខ្លួននិងកាត់ទោស។ នេះបើតាមកាសែតភ្នំពេញប៉ុស្តិ៍ចុះផ្សាយនៅថ្ងៃនេះ។
ទោះយ៉ាងណាក៏ដោយលោក ឱម យិនទៀង ប្រធានអង្គភាពប្រឆាំងអំពើពុករលួយបានបដិសេធចំពោះការចោទប្រកាន់នេះ។ លោកថា លោកត្រៀមឯកសាររួចហើយសម្រាប់តទល់ជាមួយក្រុមហ៊ុននោះតាមផ្លូវច្បាប់។
លោកបញ្ជាក់ថា៖ “ខ្ញុំថ្កោលទោសហើយខ្ញុំត្រៀមដោះស្រាយវាតាមផ្លូវច្បាប់ ទី២បើសិនជាគាត់ពិតជាមានចេតនាល្អមែន ខ្ញុំត្រៀមសហការជាមួយគាត់ (លោក Gregg Thomas Fryett)”។
លោក ជួន សុរាសី ប្រធានក្រុមប្រឹក្សាជំនុំជម្រះរឿងនេះបានប្រាប់វីអូឌីនៅរសៀលនេះថា លោកមិនបានដឹងពីការទារលុយពីក្រុមហ៊ុន ហើយលោកសុំមិនអត្ថាធិប្បាយលើករណីនេះបន្ថែមទេ។
លោក សុក សំអឿន មេធាវីការពារជនជាប់ចោទពីរនាក់ក្នុងសំណុំរឿងនេះមានប្រសាសន៍ថា លោកមិនបានដឹងពីរឿងតុលាការនិងអង្គភាពប្រឆាំងអំពើពុករលួយទារសំណូកពីកូនក្តីរបស់លោកនោះទេ។ ប៉ុន្តែលោកថាបើសិនក្នុងករណីដែលមានសំណូកសូកប៉ាន់នេះមែន លោក ឱម យ៉ិនទៀង គួរតែរៀបចំពិនិត្យរកអ្នកដែលណាដែលជាអ្នកទាមទារសំណូកនោះ។
លោកបន្ថែមថា៖ “អាណឹងរឿងផ្សេងដាច់ដោយឡែកអត់ដឹងទេ រឿងពុករលួយតាមពិតអង្គភាពប្រឆាំងអំពើពុករលួយហ្នឹង ប៉ុន្តែដូចថាបើសិនជាគាត់អង្គភាពប្រឆាំងអំពើពុករលួយចឹង យើងមិនដឹងថាអ្នកណាផងអីចឹងមានតែឯកឧត្តម ឱម យ៉ិនទៀង គាត់រៀបចំពិនិត្យមើលទៅថាអ្នកដែលវាមានអីចឹងទៅណា បើសិនជាបុគ្គលិកក្នុងអង្គភាពប្រឆាំងអំពើពុករលួយគាត់ធ្វើអីចឹង អាហ្នឹងធ្វើការស៊ើបអង្កេតតាមពាក្យបណ្តឹងឬក៏ការតវ៉ារបស់ជនជាប់ចោទទៅ”។
ជនជាប់ចោទដែលត្រូវបានតុលាការសម្រេចផ្តន្ទាទោសនោះមានឈ្មោះ អ៊ុំ សំអាង ជានាយកក្រុមហ៊ុនជាប់ពន្ធនាគារ៧ឆ្នាំ ពិន័យទឹកប្រាក់១០លានរៀល លោក Gregg Thomas Fryett ប្រធានក្រុមប្រឹក្សាភិបាលក្រុមហ៊ុនជាប់ពន្ធនាគារ៨ឆ្នាំ ពិន័យទឹកប្រាក់១០លានរៀល និងសហការី៤នាក់ផ្សេងៗទៀតផ្តន្ទាទោសពី៣ទៅ១០ឆ្នាំ និងពិន័យទឹកប្រាក់ពី៥ទៅ១០លានរៀល៕
