តុលាការកោះហៅប្រធានផ្នែកស៊ើបអង្កេតអង្គការលីកាដូលោក អំ សំអាត និងតំណាងសហគមន៍បឹងកក់លោក ច័ន្ទ ពុទ្ធិស័ក ឲ្យឆ្លើយបំភ្លឺតាមបណ្តឹងរបស់សន្តិសុខខណ្ឌដូនពេញ២នាក់ ពាក់ព័ន្ធនឹងហិង្សាកាលពីថ្ងៃទី១០ តុលា ឆ្នាំ២០១៦ ខណៈដែលពាក្យបណ្តឹងរបស់លោក អំ សំអាត និងលោកពុទ្ធិស័កមិនទាន់មានចំណាត់ការពីតុលាការ។
ក្នុងសេចក្តីថ្លែងការណ៍ចុះថ្ងៃទី៧ កុម្ភៈ អង្គការលីការដូបានឲ្យដឹងថាតុលាការរាជធានីភ្នំពេញបានកោះហៅមន្ត្រីរបស់ខ្លួនលោក អំ សំអាត និងតំណាងសហគមន៍បឹងកក់ លោក ច័ន្ទ ពុទ្ធិស័ក ឲ្យចូលខ្លួនបំភ្លឺចំពោះមុខព្រះរាជអាជ្ញាលោក ងិន ពេជ នៅរសៀលថ្ងៃទី៨ កុម្ភៈ ស្អែក តាមបណ្តឹងរបស់សន្តិសុខខណ្ឌដូនពេញពីរនាក់ឈ្មោះ សំ សុធារ៉ា និង តែត ចន្ធូ ដែលបានប្តឹងចោទថា មន្រ្តីសិទ្ធិមនុស្សនិងសកម្មជនដីធ្លីប្រើប្រាស់ហិង្សាលើពួកគេនៅពេលមានការប៉ះទង្គិចគ្នាក្នុងទិវាសិទ្ធិលំនៅឋានកាលពីខែតុលាឆ្នាំមុន។
នាយកអង្គការលីកាដូ លោក ថាវ គឹមសាន បានឲ្យវីអូឌីដឹងនៅរសៀលនេះថា ការកោះហៅរបស់តុលាការនេះវាជាភាពលំអៀងមួយ ខណៈដែលមន្ត្រីរបស់លោក និងសកម្មជនបឹងកក់ គឺជាអ្នកទទួលរងគ្រោះពិតប្រាកដពីហិង្សានោះ នឹងបានដាក់ពាក្យបណ្តឹងដែរនោះ រហូតមកដល់ពេលនេះមិនមានដំណឹងពីចំណាត់ការពីតុលាការនោះទេ។
លោកថា៖ «ពីព្រោះថាលោក អំ សំអាត ក៏ដូចជាលោក ច័ន្ទ ពុទ្ធិស័ក្ត ហ្នឹង គាត់បានទៅដាក់ពាក្យបណ្តឹងភ្លាមៗបន្ទាប់ពីមានអំពើហិង្សាប្រព្រឹត្តិមកលើគាត់នៅពេលដែលគាត់មានរបួសហ្នឹងអញ្ចឹងគាត់ទៅដាក់ភ្លាមៗនៅប៉ុស្តិនគរបាលជ័យជំនៈ យើងអត់បានដឹងថាសន្តិសុខហ្នឹងគាត់ដាក់ពាក្យបណ្តឹងតាំងពីពេលណាឲ្យបានច្បាស់លាស់ទេ ទំនងជានៅថ្ងៃតែមួយបើតាមខ្ញុំឮ វាបែបជាពាក្យបណ្តឹងរបស់លោក អំ សំអាត និងលោក ច័ន្ទ ពុទ្ធិស័ក្កហ្នឹងមិនបានទៅដល់ដៃព្រះរាជអាជ្ញា ហើយផ្ទុយទៅវិញអ្នកទាំងពីរដែលជាជនរងគ្រោះត្រូវតុលាការចេញដីការកោះដើម្បីសាកសួរនៅថ្ងៃស្អែក។ នេះជាចំណុចដែលមើលទៅអ្នកណាក៏អាចអៈអាងថាជាការលំអៀងដែរ»។
លោក គឹម សាន ក៏បានឲ្យដឹងផងដែរថាលោក អំ សំអាត និងលោក ពុទ្ធិស័ក នឹងចូលខ្លួនតាមការកោះហៅនោះ។ ទោះជាយ៉ាងណាលោកសង្ឃឹមថា តុលាការនឹងពិចារណាពីបញ្ចប់សំណុំរឿងនេះបន្ទាប់ពីសាកសួរមន្ត្រីរបស់ខ្លួន និងសកម្មជនសិទ្ធិដីធ្លីនៅថ្ងៃស្អែកនេះ។
គួររំលឹកផងដែរថា កាលពីព្រឹកថ្ងៃទី១០ តុលា ឆ្នាំ២០១៦ ក្នុងការប្រារព្ធទិវាសិទ្ធិលំនៅឋានពិភពលោក ក្រុមសហគមន៍ដីធ្លីដែលរងការបណ្តេញចេញ ដែលមានមនុស្សប្រមាណជាង៣០០នាក់ បានចូលរួមដើរក្បួនពីដីក្រហមឆ្ពោះទៅកាន់ទីលានប្រជាធិបតេយ្យដើម្បីអបអរសារទរទិវានេះ។ ខណៈដែលក្បួនដើរមកដល់ជិតសាលាភូមិន្ទវិចិត្រសិល្បៈ ហៅសាលារចនា សន្តិសុខខណ្ឌដូនពេញប្រមាណ៣០នាក់បានចេញមកចាប់ដណ្តើមយកស្គរ និងបដា ដែលក្បួនដង្ហែរបានរៀបចំ បណ្តាលឲ្យមានការប្រទាញប្រទង់គ្នារវាងអ្នកដើរក្បួននិងសនិ្តសុខ។
ខណៈដែលមានការប្រទាញប្រទង់គ្នានោះលោក ច័ន្ទ ពុទ្ធិស័ក ត្រូវបានសន្តិសុខខណ្ឌវាយឲ្យជ្រុះទូរសព្ទ និងវាយទៅលើរូបលោក។
មន្ត្រីសិទ្ធិមនុស្សលីកាដូ លោក អំ សំអាត ដែលបានឃ្លាំមើលការហែក្បួនក៏បានចូលទៅរារាំងកុំមានហិង្សា បែរជាត្រូវសន្តិសុខខណ្ឌងាកមកវាយលោកវិញបណ្តាលឲ្យរងរបួសបែកមាត់ និងហើមមុខ ហើយសន្តិសុខខណ្ឌក៏បានរាលដាលវាយទៅលើអ្នកផ្សេងទៀត ក្នុងនោះអ្នកថតវីដេអូវីអូឌីម្នាក់ក៏ត្រូវបានសន្តិសុខគម្រាម និងបានវាយត្រូវបន្តិចផងដែរ៕
