មានការលើកឡើងជាច្រើនថា ផលិតកម្ម Red Picture គឺជាសាខាភាគហ៊ុនរបស់ផលិតកម្ម LD Picture ដោយសារតែគេកត់សម្គាល់ថាទាំងថៅកែផលិតកម្មនិងក្រុមការងាររបស់ផលិតកម្ម Red Picture សុទ្ធតែជាក្រុមការងារចាស់របស់ផលិតកម្ម LD Picture ហើយផលិតកម្មទាំងពីរនាពេលកន្លង គឺមិនខុសពីបងប្អូនគ្នាឬក្រុមការងារតែមួយ។
យ៉ាងណាមិញ ក្នុងរយៈពេលចុងក្រោយ មានការប្រកាសថាផលិតកម្មទាំងពីរអន់ចិត្តគ្នា បែកហ៊ុនពីរគ្នា តែត្រូវបានផលិតករទាំងពីរចេញមុខបកស្រាយ។
កន្លងមកលោក លៀក លីដា ចាងហ្វាងផលិតកម្ម LD Picture បានអះអាងហើយថា ផលិតកម្ម Red Picture មិនមានអ្វីពាក់ព័ន្ធនឹងលោក ដោយគ្រាន់តែលោក ប្រាក់ សុវណ្ណរា ដែលសុទ្ធតែជាមិត្តក្នុងអាជីពនិងក្រុមការងារចាស់រួមគ្នាទៅបើកផលិតកម្ម ហើយលោកក៏ជួយជ្រោមជ្រែងប៉ុណ្ណោះ។ តែការបញ្ជាក់ទាំងនោះហាក់មិនមានទម្ងន់ ដោយកាន់តែបែកសាយភាពខ្លាំងឡើងថារវាងលោកនិងផលិតកម្ម Red Picture ជាផលិតកម្មតែមួយ តែកំពុងដាច់ដោចគ្នា ព្រោះតែកាច់កុងមុខជំនួញ។
លោក លីដា បន្តថា ផលិតកម្មរបស់ដាច់គ្នាទាំងស្រុងជាមួយ Red Picture ដោយតាំងពីដើមរៀងមក ថ្វីដ្បិតតែពេលផលិតរឿងមានលោកទៅចូលរួមបើកសម្ពោធ ហើយពេលខាងផលិតកម្មក្រុងពាលីក៏មានតំណាងខាងRed Picture មកធ្វើជាកិត្តិយសវិញ ប៉ុន្តែស្ថានភាពរកស៊ី គឺរៀងៗខ្លួនសុទ្ធសាធ។
មិនខុសគ្នាដែរ លោក ឌៀប សុវណ្ណរ៉ា ចាងហ្វាងផលិតកម្ម Red Picture បានថ្លែងក្នុងពិធីសម្ពោធរឿង «ផ្ទះសរសរកណ្ដាល» កាលពីថ្ងៃទី៦ មីនា ថា ផលិតកម្មរបស់លោកមិនមែនជាផ្នែកឬជាសាខារបស់ផលិតកម្ម LD Picture នោះទេ។
លោកថារវាងលោកនិងលោក លៀក លីដា គ្រាន់តែធ្លាប់បានរួមការងារជាមួយគ្នា ប៉ុន្តែក្រោយពេលលោកសម្រេចចិត្តបោះទុនបើកជាផលិតកម្ម គឺលោកមិនបានទទួលចំណែកភាគហ៊ុនណាមួយពីលោក លៀក លីដា ឬក្រុមការងាររបស់ផលិតកម្ម LD Picture នោះឡើយ។
លោកថាមានការលើកឡើងជាច្រើនថាការផលិតរឿងចំនួន៤កន្លងមករបស់ Red Picture គឺជាការចាត់ចែងរបស់ផលិតកម្ម LD Picture ឬជារឿងដែលស្ថិតក្នុងការដាក់ហ៊ុនរួមគ្នា។
លោកនិយាយថា «ខ្ញុំឮច្រើនមកហើយថាផលិតកម្ម Red Picture ពាក់ព័ន្ធនឹងផលិតកម្មមួយ(LD)តែខ្ញុំចង់ប្រាប់ថាផលិតកម្មទាំងពីរនឹងអត់មានជាប់ហ៊ុនអីជាមួយគ្នាទេ!»។
លោកបានច្រានចោលព័ត៌មានដែលលើកឡើងថាទំនាក់ទំនងមិនសូវជិតស្និទ្ធិចុងក្រោយជាមួយលោក លៀក លីដា និងក្រុមការងាររបស់ផលិតកម្ម LD គឺដោយសារតែពួកលោកបែកហ៊ុននិងឈានដល់ការកុងគ្នាក្រោយពេលជោគជ័យរៀងខ្លួន។ លោកបញ្ជាក់ថា រវាងលោកនិងផលិតកម្ម LD នៅតែជាបងប្អូនល្អ ប៉ុន្តែហេតុផលមិនសូវទាក់ទង គឺដោយសារតែលោកនិងលោក លៀក លីដា សុទ្ធតែរវល់ផលិតរឿងរៀងខ្លួនប៉ុណ្ណោះ។
លោកនិយាយថា «ពួកយើងអត់មានអន់ចិត្តគ្នា អត់មានឈ្លោះគ្នា អត់មានបែកហ៊ុនអីពីគ្នា និយាយរួមយើងរាប់អានគ្នាក្នុងនាមជាអ្នកមានប្រភពដូចគ្នា ហើយកន្លងមកអត់មានហ៊ុនអីជាមួយគ្នាទេ ទើបបញ្ហាបាក់បែកគ្នាគឺអត់មាន!»។
លោកថាខ្សែរឿង «ភូមិអត់មនុស្ស» រឿង «ទង់ព្រលឹង» និងរឿង «ផ្ទះសរសរកណ្ដាល» ចុងក្រោយ គឺជារឿងដែល Red Picture ផលិតឡើងខ្លួនឯងសុទ្ធសាធ អត់មានចំណែកភាគហ៊ុនណាមួយពីខាង LD នោះទេ ទើបលោកបញ្ជាក់ថាជម្លោះកុងគ្នាមិនមានណាមួយ។
លោកថ្លែងបែបនេះក្នុងពិធីបញ្ចេញរឿង «ផ្ទះសរសរកណ្ដាល» ដែលជារឿងប្រភេទភ័យរន្ធត់និងកំប្លែងមួយថ្មី ដោយរឿងថ្មីនេះត្រូវបានប្រកាសថានឹងដាក់លក់សំបុត្រផ្លូវការចាប់ពីថ្ងៃទី៨ មីនា នេះនៅគ្រប់រោង។ លោកថាផលិតករ LD គឺជាបងប្អូនល្អ ហើយបើទោះជាគ្មានភាគហ៊ុនរួមគ្នា តែពួកលោកនៅតែជួយគិតគ្នា ទើបផលិតកម្មរបស់លោកនិងរបស់ LD មានតួសម្ដែងសឹងតែដូចគ្នា ជាពិសេសគឺក្រុមនាយពែកមី នាយគ្រឿន និងលោកជាសុវណ្ណនរាហ៍ ជាដើម។ ក្នុងនោះសូម្បីទីតាំងថតរឿង ក៏ជ្រើសដូចគ្នាផងដែរ ទើបការយល់ច្រលំថា ផលិតកម្ម Red Picture និង LD Picture ជាផលិតកម្មតែមួយឬជាប់ហ៊ុនគ្នាត្រូវគេលើកឡើង ខណៈដែលផលិតករទាំងពីរមិនសូវមានពេលជួយគ្នា ក៏ផ្ទុះដំណឹងថាអន់ចិត្តគ្នានិងបែកហ៊ុនពីគ្នា។
លោក ឌៀប សុវណ្ណរ៉ា ប្រកាសថា ផលិតកម្មរបស់លោកអត់មានភាគហ៊ុនជាមួយផលិតកម្មណាមួយទាំងអស់ដោយក្នុងនោះខ្សែរឿង «ផ្ទះសរសរកណ្ដាល» ដែលបានប្រកាសដាក់បញ្ចាំងគ្រប់រោងនាពេលនេះ ក៏មិនមែនជាសមិទ្ធផលរួមគ្នាជាមួយផលិតកម្ម LD ។ លោកថារឿងនេះ លោកចំណាយជាង៣ម៉ឺនផលិត ហើយបើទោះមិនមានបំណងប្រកួតប្រជែងជាមួយ LD Picture តែក៏នឹងធ្វើរឿងអោយល្អមិនអោយចាញ់ស្នាដៃរបស់ផលិតកម្មក្នុងស្រុកណាមួយនោះដែរ៕