គ្មានអ្នកណាមិនចាប់អារម្មណ៍នោះទេ ក្នុងពេលតារាសម្ដែងជនជាតិខ្មែរឥស្លាមនាង ណាតាហ្សា ដែលត្រូវគេស្គាល់ថាបានល្បីឈ្មោះក្នុងរឿង «កំណត់ហេតុនាងនាថ» របស់ផលិតកម្មឥន្ទ្រានិមិត្ត ស្រាប់តែមកបានទទួលតំណែងតួឯកដល់ទៅពីររឿងជាប់គ្នាភ្លាមៗ ក្នុងរឿងថ្មីៗរបស់ផលិតកម្មមហាហង្ស។
នាងត្រូវផលិតករមហាហង្សប្រកាសថានឹងលើកអោយក្លាយជាតួស្រីលេចធ្លោម្នាក់តាមរយៈខ្សែរឿងបន្តបន្ទាប់ ជំនួសអ្នកនាង សុខ សោម៉ាវត្តី ដែលប្រកាសឈប់ទទួលយកការសម្ដែងក្នុងឆ្នាំ២០១៧នេះផង។
លោក អ៊ិន សុភិន ម្ចាស់ផលិតកម្មមហាហង្សបានអះអាងថា ក្នុងឆ្នាំ២០១៧នេះ តារាសម្ដែងនាង សុខ សោម៉ាវត្តី មិនសូវចង់ទទួលសម្ដែងនោះទេ ដោយសារតែនាងមានភារៈចង់បើកគម្រោងរកស៊ី ហើយប្រកាសឃ្លាតឆ្ងាយពីសិល្បៈដើម្បីងាកទៅគិតរឿងរកស៊ី។
លោកថានាងបានទទួលសម្ដែងជាតួឯកក្នុងរឿង «ក្រមុំចាស់ប៉ះកំលោះស្ទាវ» ជាមួយនឹងតារាសម្ដែងនាង ណាតាហ្សា ដោយភាពទើសទាល់ប៉ុណ្ណោះ ទើបលោកគិតថាបើតារាស្រីរូបនេះប្រកាន់ជំហរឈប់សម្ដែងគឺមានតែរកអ្នកជំនួស ដែលអាចសម្ដែងបានច្រឡឺម និងក្រមិចក្រមើមដូចនាង។
លោកថាខ្លួនបានសំឡឹងឃើញតួឯកស្រីក្នុងរឿង «កំណត់ហេតុនាងនាថ» នាង ណាតាហ្សា ទើបសម្រេចយកនាងមកអោយសម្ដែងតួឯកក្នុងរឿង «ក្រមុំចាស់ប៉ះកំលោះស្ទាវ» គូជាមួយអ្នកនាង សុខ សោម៉ាវត្តី ហើយកត់សម្គាល់ឃើញថាល្អមិនចាញ់គ្នា ដែលជំរុញអោយលោកអោយនាងអោយធ្វើតួឯកម្ដងទៀតក្នុងរឿង «កញ្ចក់» ដែលទើបនឹងបានចេញថតបានប៉ុន្មានថ្ងៃ។
លោកថាហេតុផលដែលលោកជ្រើសយក ណាតាហ្សា អោយសម្ដែង២រឿងជាប់គ្នា គឺដោយសារតែផលិតកម្មរបស់លោកមានអ្នកផលិតច្រើនក្រុម ដោយគ្រាន់តែក្រុមផលិតភាពយន្តខ្នាតធំ និងក្រុមផលិតរឿងភាគ មានរហូតដល់២បីក្រុមផ្សេងគ្នា និងត្រូវការផលិតរឿងភាគ និងរឿងដុំបណ្ដាក់គ្នាដើម្បីតម្រូវការប្រកួតប្រជែង។
លោកថាផលិតកម្មមហាហង្សមានគម្រោងអោយ សុខ សោម៉ាវត្តី សម្ដែងតួឯកច្រើនរឿង តែដោយសារតែនាងចាប់ផ្ដើមបដិសេធ ទើបលោកយល់ថាតំណែងមួយនោះទំនងជាសមចំពោះ ណាតាហ្សា សម្រាប់ក្រសែភ្នែករបស់លោក។
លោកថាក្នុងរឿង «កំណត់ហេតុនាងនាថ» ណាតាហ្សា មិនបានសម្ដែងអោយឃើញពីសមត្ថភាពក្រមិចក្រមើមនោះទេ ប៉ុន្តែតាមរយៈឱកាសបានធ្វើការជាមួយនាងក្នុងរឿង «ក្រមុំចាស់ប៉ះកំលោះស្ទាវ» ទើបលោកដឹងថានាងសម្ដែងជាតួអង្គច្រឡឺម និងកំប្លែងបានល្អ ដោយការប៉ះគ្នាជាមួយតារាសម្ដែង សុខ សោម៉ាវត្តី គឺលោកយល់ថាអ្នកទំាងពីលេងច្រឡឺមបានស៊ីសង្វាក់គ្នា។
លោកថាលោករកឃើញអ្នកអាចលេងបានតំណែងរបស់ សុខ សោម៉ាវត្តី ហើយ តែនោះមិនមានន័យថាអោយតែគ្រប់សាច់រឿងដែលលោកយល់ថាសមនឹង សុខ សោម៉ាវត្តី សុទ្ធតែយកមកអោយ ណាតាហ្សា សម្ដែងនោះទេ គឺគ្រាន់តែមានសម្អាងថាបើ សុខ សោម៉ាវត្តី អត់ទទួលលេង លោកនឹងមានតួសម្រាប់ត្រៀមទុកប៉ុណ្ណោះ។
លោកនិយាយថា «ឥឡូវហ្នឹង អាតី គាត់អត់សូវចង់ទទួលរឿងទេ ចឹងហើយទើបខ្ញុំយល់ថាបើ អាតី អត់លេង Role (ចរឹត)តួអាតី គឺ ណាតាហ្សា លេងល្អ ចឹងបានគ្រាន់តែខ្ញុំឃើញគាត់លេងល្អក្នុងរឿងទី១របស់ខ្ញុំ ខ្ញុំអោយគាត់ធ្វើតួឯកក្នុងរឿង «កញ្ចក់» មួយទៀតភ្លាម»។
លោកថា ណាតាហ្សា ជាខ្មែរឥស្លាមនិងជាតួថ្មីម្នាក់ តែសមត្ថភាពសម្ដែងរបស់នាងមិនអន់ជាងតារាជើងចាស់នោះទេ ដោយសូម្បីតែការយល់ពីប្រពៃណីខ្មែរក៏ច្រើនណាស់ដែរទើបនាងសម្ដែងសម។
លោកថាតាមរយៈរឿង «កញ្ចក់» មហាជននឹងដឹងកាន់តែច្បាស់ថា ណាតាហ្សា ពូកែក្រមិចក្រមើម ទើបលោកប្រកាសថាក្រោយបញ្ចប់រឿង២របស់នាងនៅមហាហង្ស លោកនឹងអោយសម្ដែងជាតួ២បីរឿងទៀត ដើម្បីអោយនាងកាន់តែឡើងកូដ។
លោកថារឿង «កញ្ចក់» នឹងដាក់បញ្ចាំងតាមកុនមិនហួសពីចុងឆ្នាំនេះ ដោយលោករំពឹងថានឹងក្លាយជារឿងដែលមានមានការចាប់អារម្មណ៍នោះផង។
កញ្ញា ណាតាហ្សា បានអះអាងថាក្នុងចំណោមរឿងចំនួន២របស់ផលិតកម្មមហាហង្ស នាងពេញចិត្តជាងគេគឺរឿង «កញ្ចក់» ដោយសារតែក្នុងរឿងនោះមានឈុតជាច្រើនដែលនាងយល់ថាពិបាកសម្ដែង។ នាងថាខ្លួនសប្បាយចិត្តដែលបានធ្វើការជាមួយផលិតកម្មមហាហង្ស ដោយក្រៅពីបានទទួលតំណែងតួឯកដល់ទៅ២រឿងជាប់គ្នាក៏ត្រូវម្ចាស់ផលិតកម្មប្រកាសអោយត្រៀមសម្រាប់រឿងថ្មីបន្តទៀត។
យ៉ាងណាមិញ នាងមិនហ៊ានទទួលពាក្យថានាងសម្ដែងបានល្អដូចគ្នានឹង សុខ សោម៉ាវត្តី នោះទេ ដោយនាងប្រកាសថានៅស្ទើរច្រើនណាស់ បើអោយប្រដូចនឹងរៀមច្បងម្នាក់នោះ។
នាងថាខ្សែរឿង «កញ្ចក់» ហាក់ធ្វើអោយនាងមានទំនុកចិត្តខ្ពស់ថានឹងល្អមិនចាញ់រឿង «កំណត់ហេតុនាងនាថ» ដោយសារតែក្នុងរឿងនោះ នាងថាមានសាច់រឿងល្អ៕