ប៉ូលិសឥណ្ឌូនេស៊ី បាននិយាយនៅថ្ងៃនេះថា មនុស្ស ៥នាក់ ត្រូវបានគេចាប់ខ្លួន ដោយសង្ស័យថាក្បត់ជាតិ ពាក់ព័ន្ធនឹងគម្រោងបាតុកម្មដែលរៀបចំឡើងដោយក្រុមមូស្លីមប្រកាន់តឹង ដែលបានទាមទារឲ្យទម្លាក់អភិបាលក្រុងហ្សាកាតា លោក បាស៊ូគី ត្សាហាចា ពូណាម៉ា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកនាំពាក្យប៉ូលិសទីក្រុងហ្សាកាតា លោក អាហ្កូ យូវ៉ូណូ បានប្រាប់ថា ក្នុងចំណោមអ្នកដែលត្រូវចាប់ខ្លួននោះ គឺមានមេដឹកនាំក្រុមមូស្លីមជ្រុលនិយម លោក មូហាមេដ អាល់ ខាតថាត់។
បាតុកររាប់ពាន់នាក់ ដែលដឹកនាំដោយក្រុមជ្រុលនិយម បានប្រមូលផ្ដុំគ្នានៅឯវិហ៊ាដ៏ធំមួយក្នុងទីក្រុងហ្សាកាតា នៅថ្ងៃនេះ ខណៈដែលប៉ូលិស និងយោធា បានបិទផ្លូវនានា ចូលទៅវិមានប្រធានាធិបតី នៅកណ្ដាលទីក្រុងនេះ។ ក្រុមបាតុករចង់ឲ្យទម្លាក់អភិបាលក្រុងហ្សាកាតា ដោយចោទថា បានជេរប្រមាថដល់គម្ពីកូរ៉ាន់។
លោក បាស៊ូគី ដែលជាអភិបាលក្រុងកាន់សាសនាគ្រីស្តដើមកំណើតចិនដំបូងគេនោះ ត្រូវបានគេចោទថាបានប្រមាថដល់សាសនាឥស្លាម នៅពេលលោកលើកឡើងថា គូប្រជែងរបស់លោកបានប្រើប្រាស់គម្ពីកូរ៉ាន់ នៅក្នុងយុទ្ធនាការឃោសនានយោបាយ។ លោកក៏បានថ្លែងសុំទោសផងដែរនាពេលក្រោយមក ប៉ុន្តែ បានបដិសេធថា លោកពុំបានប្រព្រឹត្តកំហុសនោះឡើយ។
ក្បួនបាតុកម្មនៅថ្ងៃនេះ គឺជាការតវ៉ាថ្មីបំផុតនៅក្នុងចំណោមការតវ៉ាជាហូរហែរមកហើយ ដែលជាការសាកល្បងទំនាស់សាសនា និងជនជាតិភាគតិចនៅក្នុងប្រទេសឥណ្ឌូនេស៊ី។ ប៉ូលិសបាននិយាយនៅដើមសប្ដាហ៍នេះថា មនុស្សប្រហែល ២ម៉ឺននាក់ មកពីក្រុមនានា ត្រូវបានគេព្យាករថា នឹងចូលរួមក្នុងបាតុកម្មនេះ។
ការតវ៉ានេះបានកើតឡើងមុនការបោះឆ្នោតជ្រើសរើសអភិបាលក្រុងហ្សាកាតាជុំទីពីរ នៅថ្ងៃទី១៩ ខែមេសាខាងមុខនេះ ខណៈដែលលោក បាស៊ូគី កំពុងប្រឈមមុខនឹងគូប្រជែងដ៏តឹងតែង គឺលោក អាណី បាស្វេដាន អតីតរដ្ឋមន្ត្រីអប់រំឥណ្ឌូនេស៊ី៕
