ពលរដ្ឋម៉ាឡេស៊ី ៩នាក់ ដែលត្រូវបានក្រុងព្យុងយ៉ាងដោះលែងនោះ បានធ្វើដំណើរទៅដល់ប្រទេសកំណើតនៅព្រឹកថ្ងៃនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បើតាម AFP ពលរដ្ឋម៉ាឡេស៊ីទាំងនោះ ត្រូវបានដោះលែងមកវិញ បន្ទាប់ពីក្រុងគួឡាឡំពួរ បានឯកភាពប្រគល់សពបងប្រុសរបស់មេដឹកនាំកូរ៉េខាងជើង ឲ្យក្រុងព្យុងយ៉ាងវិញ ដោយបានបញ្ចប់វិវាទជូរចត់រវាងប្រទេសទាំងពីរ។
លោក គីម ជុងណាម ត្រូវបានគេបំពុលសម្លាប់កាលពីថ្ងៃទី១៣ ខែកុម្ភៈ នៅឯព្រលានយន្តទីក្រុងគួឡាឡំពួរ ដោយបង្កឲ្យមានជម្លោះកាទូតរវាងប្រទេសម៉ាឡេស៊ី និងកូរ៉េខាងជើង ដែលនាំទៅរកការហាមឃាត់ពលរដ្ឋម៉ាឡេស៊ី មិនឲ្យចាកចេញពីប្រទេស។
ប៉ុន្តែ កិច្ចព្រមព្រៀងមួយដែលប្រកាសឡើងដោយនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ ហើយត្រូវបានប្រព័ន្ធផ្សព្វផ្សាយរដ្ឋកូរ៉េខាងជើងប្រកាសកាលពីថ្ងៃម្សិលមិញនេះ បាននិយាយថា ប្រទេសទាំងពីរបានសម្រេចដកចេញការហាមឃាត់ការធ្វើដំណើរ ហើយក្រុងគួឡាឡំពួរ នឹងបញ្ជូនសពលោក គីម ជុងណាម ទៅកូរ៉េខាងជើង។
បុគ្គលិកស្ថានទូត ៣រូប និងសមាជិកគ្រួសារ ៦នាក់ បានចុះនៅឯព្រលានយន្តហោះអន្តរជាតិទីក្រុងគួឡាឡំពួរ មុនថ្ងៃរះនៅព្រឹកនេះ ដោយពួកគេទទួលបានការស្វាគមន៍ពីរដ្ឋមន្ត្រីការបរទេសម៉ាឡេស៊ី លោក អានីហ្វាហ៍ អាម៉ាន់៕