អគ្គរដ្ឋទូតអាមេរិកប្រចាំអង្គការសហប្រជាជាតិ បានថ្លែងនៅថ្ងៃនេះថា ចិនអាច និងត្រូវតែធ្វើកិច្ចការបន្ថែមទៀត ដើម្បីបង្ខំកូរ៉េខាងជើង ឲ្យបញ្ឈប់កម្មវិធីគ្រាប់មីស៊ីល និងនុយក្លេអ៊ែររបស់គេ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អគ្គរដ្ឋទូតអាមេរិក អ្នកស្រី Nikki Haley បាននិយាយថា ប្រធានាធិបតីអាមេរិក លោក ដូណាល់ ត្រាំ នឹងលើកឡើងពីបញ្ហានេះនៅសប្ដាហ៍ក្រោយ នៅអំឡុងជំនួបកំពូលលើកដំបូងរបស់ប្រធានាធិបតីអាមេរិករូបនេះ ជាមួយមេដឹកនាំចិន លោក ស៊ី ជិនពីង។
ចំពេលដែលមានសេចក្ដីរាយការណ៍ថា ក្រុងព្យុងយ៉ាងកំពុងរៀបចំសាកល្បងគ្រាប់បែកនុយក្លេអ៊ែរមួយទៀតនោះ អ្នកស្រី Haley បាននិយាយថា ក្រុងវ៉ាស៊ីងតោននឹងមិនរៀបចំកិច្ចពិភាក្សានៅអង្គការសហប្រជាជាតិទៀតនោះឡើយ។
អ្នកស្រី Haley បានបន្តថា ចិនអាចបង្ហាញឲ្យគេឃើញថា ខ្លួននឹងហាមឃាត់ក្រុងព្យុងយ៉ាងបាន តាមរយៈការរាំងខ្ទប់ការដឹកជញ្ជូនប្រឆាំងនឹងការនាំចេញធ្យូងថ្មរបស់កូរ៉េខាងជើង។
ប្រទេសចិន បានប្រកាសថា ខ្លួននឹងហាមឃាត់ការនាំចូលធ្យូងថ្មពីកូរ៉េខាងជើងចាប់ពីថ្ងៃទី១៨ ខែកុម្ភៈ ប៉ុន្តែ ពេញមួយខែនោះដដែល ការនាំចូលធ្យូងថ្មនៅតែដំណើរការទៅ ដោយកើនឡើងដល់ទៅ ៤០ភាគរយទៀតផង។
អ្នកស្រី Haley បានចោទថា ក្រុងប៉េកាំងនៅតែអនុញ្ញាតឲ្យមានការនាំចូលធ្យូងថ្មពីកូរ៉េខាងជើង តាមមធ្យោបាយផ្សេងវិញ ហើយអ្នកស្រីទាមទារទៅចិន ឲ្យចាត់ការរឿងនេះឲ្យបានហ្មត់ចត់ ដូចទៅនឹងប្រទេសដទៃទៀតលើពិភពលោក។
លោក ត្រាំ និងលោក ស៊ី នឹងជួបប្រជុំគ្នានៅសប្ដាហ៍ក្រោយ នៅឯទីលានវាយកូនហ្គោលនៅរដ្ឋ Florida ដែលនោះគឺជាជំនួបតទល់គ្នាលើកដំបូងរវាងមេដឹកនាំមហាអំណាចទាំងពីរ៕