សម្ព័ន្ធមិត្តអាមេរិក កូរ៉េខាងត្បូង និងជប៉ុន ចាប់ផ្តើមធ្វើសមយុទ្ធទាហានជើងទឹករួមគ្នានៅថ្ងៃចន្ទនេះ ដើម្បីត្រៀមទប់ទល់មីស៊ីលបាញ់ចេញពីនាវាមុជទឹករបស់កូរ៉េខាងជើង ខណៈកូរ៉េខាងជើងគំរាមបាញ់មីស៊ីលនិងនុយក្លេអ៊ែបន្តបន្ទាប់។
កូរ៉េខាងជើង ត្រូវបានគេអះអាងថា កំពុងតែអភិវឌ្ឍន៍គ្រាប់មីស៊ីលកម្រិតវែងរបស់ខ្លួន ដែលនាំក្បាលគ្រាប់នុយក្លេអ៊ែ ដែលអាចបាញ់ដល់សហរដ្ឋអាមេរិក ហើយគ្រាប់ប្រភេទនេះ បានបាញ់សាកល្បងបន្តបន្ទាប់រយៈពេល២ឆ្នាំមកនេះ។
សមយុទ្ធសម្ព័ន្ធមិត្តទាំងបីនេះ ចាប់ផ្តើម៣ថ្ងៃគឺមានកម្លាំងទ័ពចូលរួមប្រមាណ៨០០នាក់ ដែលសមយុទ្ធនេះចាប់ផ្តើមឡើង ស្របពេលដែលលោក ដូណល ត្រាំ ប្រធានាធិបតីអាមេរិកព្រមានថា ខ្លួនបានត្រៀមរួចរាល់ហើយក្នុងការដោះស្រាយបញ្ហាកម្មវិធីអាវុធនុយក្លេអ៊ែរបស់កូរ៉េខាងជើង។
សមយុទ្ធនេះ ចាប់ផ្តើមនៅឆ្នេរសមុទ្រភាគខាងត្បូងរបស់កូរ៉េខាងត្បូង នៅជិតព្រំដែនជាមួយជប៉ុន។ វគ្គនេះ មានបង្ហាញពី សមត្ថភាពរបស់នាវា និង ឧត្ថម្ភាចក្រ វាយកំទេចនាវាមុជទឹក។
រដ្ឋមន្ត្រីការពារជាតិរបស់កូរ៉េខាងត្បូងបញ្ជាក់ថា សមយុទ្ធនេះ ជួយពង្រឹងសមត្ថភាពក្នុងការទប់ទល់ជាមួយ មីស៊ីលដែលបាញ់ចេញពីនាវាមុជទឹករបស់កូរ៉េខាងជើង និងជាការបង្ហាញពីការប្តេជ្ញារួមគ្នារវាងប្រទេសទាំងបី៕
