អ្នកតវ៉ារាប់ពាន់នាក់តវ៉ាដើរលើផ្លូវករណីសម្លាប់ជនជាតិចិននៅបារាំង

មនុស្សប្រមាណ៦០០០នាក់ ដើរលើផ្លូវនៅក្នុងទីក្រុងបារីសប្រទេសបារាំង តវ៉ាកាលពីថ្ងៃអាទិត្យម្សិលមិញ ដោយខឹង ចំពោះករណីនគរបាលបាញ់សម្លាប់បុរសជាជនជាតិចិនម្នាក់។​

តាមការចុះផ្សាយរបស់ Channel News Asia ឲ្យដឹងថា ការតវ៉ានេះ រៀបចំឡើងដោយសហគមន៍ជនជាតិចិនជាច្រើនកន្លែងនៅក្នុងប្រទេសបារាំង ហើយពួកគេបានធ្វើសកម្មភាពតវ៉ាបន្តបន្ទាប់ជាច្រើនថ្ងៃមកហើយ ហើយបានឈានដល់ការប៉ះទង្គិចជាមួយសមត្ថកិច្ចទៀតផង។​

អ្នកតវ៉ាបានចោលដបទឹក ស៊ុត និង ផ្លែឈើទៅនគរបាល ដើម្បីឆ្លើយតប និង នគរបាលបានប្រើប្រាស់​ឧស្ម័នបង្ហូរទឹកភ្នែកបាញ់លើក្រុមអ្នកតវ៉ាអំឡុងពេលតវ៉ា ហើយបានប៉ះទង្គិចគ្នាជាង១ម៉ោង។​

កាលពីថ្ងៃទី២៦ ខែមីនា បុរសជនជាតិចិនអាយុ៥៦ឆ្នាំ ដែលមានកូន៥នាក់ បានស្លាប់ ដោយសារនគរបាលបាញ់នៅក្នុងផ្ទះរបស់លោកនៅភាគ​ឦសាន នៃទីក្រុងប៉ារីស ដែលសង្ស័យថា មានជម្លោះក្នុងគ្រួសារហើយ នគរបាលអន្តរាគមន៍។​

អាជ្ញាធរបញ្ជាក់ថា បុរសជនជាតិចិនរូបនោះ បានយកកូនកាំបិទចាក់លើសមត្ថកិច្ចបណ្តាលឲ្យរងរបួសហើយ សមត្ថកិច្ចក៏បាញ់តប ដើម្បីការពារខ្លួន។​ ប៉ុន្តែក្រុមគ្រួសារនៃសពនោះបញ្ជាក់ថា មិនមែនជា ករណីជម្លោះក្នុងគ្រួសារ គឺថា នគរបាលបានបាញ់ដោយមិនជូនដំណឹងទេ គឺបាញ់ក្រោយពេលអ្នកជិតខាងបានហៅនគរបាល ឲ្យជួយដោះស្រាយករណីអ្វីមួយ៕