មនុស្ស១១នាក់ ត្រូវបានសម្លាប់ ហើយរាប់សិបនាក់ទៀត បានរងរបួស បន្ទាប់ពីមានការបំផ្ទុះគ្រាប់បែកមួយនៅក្នុងទូររថភ្លើងនៅទីក្រុង St. Petersburg ដែលគេសង្ស័យថា គ្រាប់បែកនោះត្រូវបានរៀបចំបំផ្ទុះដោយជនវាយប្រហារអត្តឃាតម្នាក់ ដែលមានទំនាក់ទំនងនឹងពួកឥស្លាមជ្រុលនិយម។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា អាជ្ញាធររុស្ស៊ីបានបិទប្រព័ន្ធរថភ្លើងនៅទីក្រុងមួយនេះអស់រយៈពេលជាច្រើនម៉ោង ខណៈដែលទីភ្នាក់ងារសន្តិសុខនិយាយថា ពួកគេក៏បានដោះគ្រាប់បែកមួយទៀតនៅឯស្ថានីយរថភ្លើងទីពីរផងដែរ។
គណៈកម្មាធិការស៊ើបអង្កេតរុស្ស៊ី បាននិយាយថា ខ្លួនកំពុងតែស៊ើបអង្កេតទៅលើ “សកម្មភាពភេរវកម្ម” ប៉ុន្តែ ក្រុមនេះក៏នឹងស៊ើបអង្កេតទៅលើមូលហេតុផ្សេងទៀតផងដែរ។
រូបភាពដែលផ្សាយនៅលើកញ្ចក់ទូរទស្សន៍ជាតិរុស្ស៊ី បានបង្ហាញទ្វារទូររភ្លើងបែកបាក់ ខណៈសពប្រឡាក់ទៅដោយឈាម ដេកស្ដូកស្ដឹងនៅឯស្ថានីយ៍រថភ្លើង។
រថយន្តសង្គ្រោះបន្ទាន់ជាច្រើនគ្រឿង បានប្រញាប់ប្រញាល់ចូលទៅកន្លែងកើតហេតុ នៅឯស្ថានីយ៍រថភ្លើង ដែលជាបណ្ដុំប្រព័ន្ធដឹកជញ្ជូនដ៏សំខាន់នៅទីក្រុងធំលំដាប់ទីពីររបស់រុស្ស៊ី៕
