ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ បានបណ្ដេញរដ្ឋមន្ត្រីមហាផ្ទៃរបស់លោកចេញពីតំណែង ដោយថា បានធ្វើឲ្យបាត់បង់ទំនុកចិត្ត និងជំនឿជឿជាក់ ដែលនេះគឺជាការបណ្ដេញមន្ត្រីជាន់ខ្ពស់ក្នុងរដ្ឋាភិបាល ដោយសារតែបញ្ហាពុលរលួយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីមន្ត្រីពីររូបនៅគណៈរដ្ឋមន្ត្រីរបស់ហ្វីលីពីន។
មេដឹកនាំប្រកាន់តឹង លោក ឌូទើតេ បានឡើងកាន់អំណាចកាលពី ១០ខែមុន ក្រោយពីសន្យាប្រយុទ្ធប្រឆាំងនឹងគ្រឿងញៀន អំពើពុករលួយ និងបទល្មើសទូទាំងប្រទេស ដើម្បីជំរុញកំណើនសេដ្ឋកិច្ច។ លោកបានបណ្ដេញមន្ត្រីរាប់សិបនាក់ចេញពីតំណែង ក្នុងនោះមានទាំងមន្ត្រីជាន់ខ្ពស់ពីររូបខាងផ្នែកអន្តោប្រវេសន៍ និងអតីតអ្នកនាំពាក្យម្នាក់ ដោយសារតែបញ្ហាពុករលួយ។
លោក Ernesto Abella អ្នកនាំពាក្យប្រធានាធិបតីហ្វីលីពីន បាននិយាយក្នុងសេចក្ដីប្រកាសព័ត៌មានមួយថា លោក ឌូទើតេ បានបណ្ដេញរដ្ឋមន្ត្រីក្រសួងមហាផ្ទៃ លោក Ismael Sueno ចេញពីតំណែង ដោយបញ្ជាក់ថា ធ្វើឲ្យបាត់បង់ទំនុកចិត្ត និងជំនឿជឿជាក់។ អ្នកនាំពាក្យរូបនេះ បានចាត់ទុកការបណ្ដេញចេញនេះ ជាការប្រមានទៅដល់អ្នកដទៃទៀត។
កាលពីខែកុម្ភៈកន្លងមក លោក Sueno បានជួយរៀបចំការតវ៉ាមួយដែលគាំទ្រលោក ឌូទើតេ ដោយប្រមូលបានមនុស្សជាង ២សែននាក់ សម្រាប់ទប់ទល់ទៅនឹងមហាបាតុកម្មមួយ ដែលបានបរិហាការសម្លាប់មនុស្សក្រៅប្រព័ន្ធតុលាការ នៅក្រោមយុទ្ធនាការបង្ក្រាបគ្រឿងញៀនរបស់លោក ឌូទើតេ៕