ក្រុមសិទ្ធិមនុស្សជាតិម៉ាឡេស៊ី បាននិយាយនៅថ្ងៃនេះថា មនុស្សជាង ៦០០នាក់ បានស្លាប់នៅមណ្ឌលឃុំឃាំងជនអន្តោប្រវេសន៍ និងពន្ធនាគារ នៅក្នុងរយៈពេល ២ឆ្នាំកន្លងមកនេះ និងបានអំពាវនាវឲ្យមានកំណែទម្រង់ជាបន្ទាន់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
នៅក្នុងរបាយការណ៍ប្រចាំឆ្នាំ២០១៦របស់ខ្លួន ក្រុមសិទ្ធិមនុស្សម៉ាឡេស៊ី ដែលហៅកាត់ថា Suhakam បាននិយាយថា មនុស្ជាង ១០០នាក់ បានស្លាប់នៅក្នុងមណ្ឌលឃុំខ្លួនជនអន្តោប្រវេសន៍ ហើយមនុស្ស ៥២១នាក់ទៀត បានស្លាប់នៅក្នុងពន្ធនាគារ នៅឆ្នាំ២០១៥ និងឆ្នាំ២០១៦កន្លងមក។ រីឯមនុស្ស ១២នាក់ បានស្លាប់នៅក្នុងបន្ទប់ឃុំឃាំងរបស់ប៉ូលិសកាលពីឆ្នាំ២០១៥កន្លងមក។
ដោយផ្អែកតាមឯកសាររបស់ក្រុមសិទ្ធិមនុស្ស Suhakam ទីភ្នាក់ងារព័ត៌មាន Reuters បានរាយការណ៍ថា ជនបរទេស ១១៨នាក់ ក្នុងនោះមានទាំងពលករខុសច្បាប់ ជនភៀសខ្លួន និងអ្នកស្វែងរកសិទ្ធិជ្រកកោន បានស្លាប់នៅក្នុងមណ្ឌលឃុំឃាំង នៅក្នុងរយៈពេល ២ឆ្នាំចុងក្រោយនេះ។ ជាងពាក់កណ្ដាលនៃអ្នកស្លាប់ទាំងនោះ គឺជាមនុស្សចំណាកស្រុកមកពីប្រទេសភូមា។
ក្រុម Suhakam បាននិយាយថា អ្នកស្លាប់ភាគច្រើនបណ្ដាលមកពីជំងឺនៅក្នុងពន្ធនាគារ និងមណ្ឌលឃុំឃាំងទាំងអស់ ជាទីដែលរដ្ឋាភិបាលគួរតែកែលម្អលក្ខខណ្ឌ និងការថែទាំសុខមាលភាព។
អតីតអ្នកជាប់ឃុំ ទីភ្នាក់ងាររដ្ឋាភិបាល និងក្រុមសិទ្ធិមនុស្ស បានប្រាប់ Reuters អំពីស្ថានភាពរស់នៅដ៏អាក្រក់នៅមណ្ឌលឃុំខ្លួន ដែលពោរពេញទៅមនុស្សកកកុញ និងគ្មានអនាម័យ។
មនុស្សមួយចំនួននិយាយថា ពួកគេពុំទទួលបានអាហារ ទឹក ឬការថែទាំសុខភាពត្រឹមត្រូវនោះឡើយ ហើយអ្នកជាប់ឃុំជាច្រើនប្រឈមនឹងជំងឺស្បែក ជំងឺសួត ឬក៏ជំងឺឆ្លងផ្សេងៗ។ អតីតអ្នកជាប់ឃុំទាំងអស់ សុទ្ធតែអះអាងថា ពួកគេរងការវាយដុំពីសំណាក់ឆ្មាំមណ្ឌលឃុំឃាំង ឬក៏ធ្លាប់ឃើញការវាយដុំនៅក្នុងមណ្ឌលឃុំឃាំង៕