សេចក្ដីរាយការណ៍នានា បានឲ្យដឹងថា ក្រុមហ៊ុន Hyundai Motor និង Kia Motor របស់កូរ៉េខាងត្បូង បានកាត់បន្ថយផលិតកម្មផលិតរថយន្តនៅក្នុងប្រទេសចិន ខណៈដែលអារម្មណ៍ប្រឆាំងនឹងកូរ៉េខាងត្បូង និងការប្រកួតប្រជែងពីក្រុមហ៊ុនចិន បានគំរាមកំហែងដល់កំណើននៃការលក់រថយន្ត និងប្រាក់ចំណូលរបស់ក្រុមហ៊ុនទាំងពីរនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ទំហំនៃការលក់រថយន្តរបស់ក្រុមហ៊ុនផលិតរថយន្តទាំងពីរនេះនៅក្នុងប្រទេសចិន ត្រូវបានគេមើលឃើញថា បានធ្លាក់ចុះដល់ទៅ ៥២ភាគរយ នៅខែមីនាកន្លងមកនេះ បើធៀបទៅនឹងទំហំលក់កាលពីខែមីនាឆ្នាំ២០១៦កន្លងមក។ បញ្ហានេះមិនត្រឹមតែធ្វើឲ្យប្រាក់ចំណូលរបស់ក្រុមហ៊ុនទាំងពីរនេះ ធ្លាក់ចុះទេ ប៉ុន្តែ វាក៏ប៉ះពាល់ដល់ក្រុមហ៊ុនទាំងឡាយ ដែលជាអ្នកផ្គត់ផ្គង់ដល់ក្រុមហ៊ុនទាំងពីរនេះផងដែរ។ ការលក់រថយន្តនៅក្នុងទីផ្សារប្រទេសចិនរបស់ក្រុមហ៊ុនទាំងពីរនេះ មានទំហំស្មើនឹង ១ភាគរយ៣ នៃទំហំនៃការលក់រថយន្តនៅក្រៅប្រទេសកាលពីឆ្នាំ២០១៦កន្លងមក។
ភាពតានតឹងនយោបាយរវាងចិន និងកូរ៉េខាងត្បូង បានកើនឡើងកាន់តែខ្ពស់ចាប់តាំងពីចុងខែកុម្ភៈកន្លងមកនេះ ក្រោយពីក្រុមហ៊ុន Lotte Group របស់កូរ៉េខាងត្បូង បានឯកភាពផ្ដល់ដីមួយកន្លែងសម្រាប់ដំឡើងប្រព័ន្ធខែលការពារមីស៊ីលអាមេរិក។ បញ្ហានេះ បានជំរុញឲ្យក្រុងប៉េកាំងកាន់តែមានកំហឹង ប៉ុន្តែ ក្រុងសេអ៊ូលនិយាយថា ប្រព័ន្ធខែលការពារមីស៊ីលនោះ គឺជាការតបតទៅនឹងការគំរាមកំហែងពីសំណាក់កូរ៉េខាងជើង៕