មេធាវីសិទ្ធិមនុស្សកូរ៉េខាងត្បូង លោក មូន ជែអ៊ីន បានទទួលជ័យជម្នះនៅក្នុងការបោះឆ្នោតក្នុងគណបក្សប្រជាធិបតេយ្យ កាលពីថ្ងៃម្សិលមិញនេះ ដែលជួយឲ្យលោកស្ថិតនៅលើផ្លូវឆ្ពោះទៅក្លាយជាប្រធានាធិបតីថ្មី និងប្រហែលជាប្រកាន់ជំហរទន់ភ្លន់ចំពោះកូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយបន្តថា លោក មូន កំពុងតែនាំមុខលើការស្ទាបស្ទង់មតិនានា នៅមុនការបោះឆ្នោតជ្រើសរើសប្រធានាធិបតីកូរ៉េខាងត្បូង នៅថ្ងៃទី០៩ ខែឧសភាខាងមុខនេះ ដើម្បីឡើងដឹកនាំប្រទេសនេះ បន្តពីអ្នកស្រី ផាក ហ្គឹនហេ ដែលត្រូវបានតុលាការធម្មនុញ្ញសម្រេចបណ្ដេញចេញពីអំណាចកាលពីខែមុន ជុំវិញរឿងអាស្រូវពុករលួយពាក់ព័ន្ធនឹងបណ្ដាក្រុមហ៊ុនធំៗរបស់ប្រទេសនេះ។
ប្រសិនបើជាប់ឆ្នោតនោះ បុរសអាយុ ៦៤ឆ្នាំរូបនេះ ត្រូវបានគេរំពឹងថា នឹងប្រកាន់ជំហរទន់ភ្លន់នៅក្នុងគោលនយោបាយរបស់កូរ៉េខាងត្បូង ចំពោះកូរ៉េខាងជើង ជាពិសេសអាចផ្អាកការដាក់ពង្រាយប្រព័ន្ធខែលការពារមីស៊ីលអាមេរិកនៅលើទឹកដីកូរ៉េខាងត្បូង ដែលជំរុញឲ្យចិនខឹងសម្បារ។ លោក មូន ក៏ត្រូវបានគេរំពឹងថា នឹងប្រកាន់យកវិធានការតឹងរឹងប្រឆាំងនឹងក្រុមឧក្រិដ្ឋជននៅតាមបណ្ដាក្រុមហ៊ុនធំៗ។
នៅចំពោះមុខក្រុមអ្នកគាំទ្រ លោក មូន បានថ្លែងថា លោកនឹងធ្វើអ្វីៗគ្រប់យ៉ាង ដើម្បីយកចិត្តទុកដាក់ទៅលើស្តង់ដាររស់នៅរបស់ប្រជាជនដែលកំពុងធ្លាក់ចុះ ការកែប្រែសេដ្ឋកិច្ច និងសន្តិសុខជាតិ។
នៅក្នុងគោលនយោបាយដ៏សំខាន់មួយ លោក មូន បាននិយាយថា គ្មានជម្រើសនោះឡើយ ប៉ុន្តែ ត្រូវតែទទួលស្គាល់លោក គីម ជុងអ៊ុន ជាមេដឹកនាំរដ្ឋឯកោកូរ៉េខាងជើង និងដោះស្រាយបញ្ជាជាមួយមេដឹកនាំរូបនេះ។
ប្រទេសកូរ៉េទាំងពីរនេះ នៅតែស្ថិតក្នុងស្ថានភាពប្រុងប្រយុទ្ធដាក់គ្នាទៅវិញទៅមក ដោយសារតែសង្គ្រាមចន្លោះឆ្នាំ១៩៥០ ដល់ឆ្នាំ១៩៥៣ បានបញ្ចប់ទៅវិញតាមរយៈកិច្ចព្រមព្រៀងផ្អាកសង្គ្រាមមួយ ប៉ុន្តែ មិនមែនជាសន្ធិសញ្ញាសន្តិភាពនោះឡើយ៕
