អ្នកនាំពាក្យរដ្ឋាភិបាលថៃ បានឲ្យដឹងថា គណៈរដ្ឋមន្ត្រីថៃ នៅថ្ងៃនេះ បានអនុម័តលើការទិញរថក្រោះ ១០គ្រឿងពីប្រទេសចិន មានតម្លៃ ៥៨លានដុល្លារ ដើម្បីជំនួសរថក្រោះចាស់ៗទិញពីអាមេរិក ដែលនេះគឺជាការបញ្ជាទិញលើកទីពីរ នៅក្នុងគម្រោងបញ្ជាទិញរថក្រោះ ៤៩គ្រឿងពីប្រទេសចិន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ប្រទេសចិនបានបញ្ជាទិញរថក្រោះ ២៨គ្រឿងពីប្រទេសចិនកាលពីឆ្នាំមុន។
អ្នកនាំពាក្យរដ្ឋាភិបាលយោធាថៃ លោក សានស៊ឺន កែវកំណើត បានប្រាប់អ្នកយកព័ត៌មានថា រថក្រោះទាំងនោះ នឹងដាក់ជំនួសរថក្រោះ M41 ដែលមានទំហំតូច និងចាស់ទៅហើយ។
រដ្ឋមន្ត្រីការពារជាតិថៃ លោក ប្រាវីត វង្សសុវណ្ណ បានឲ្យដឹងថា ប្រទេសថៃបានប្រើប្រាស់រថក្រោះ M41 ផលិតនៅអាមេរិក ចាប់តាំងពីសង្គ្រាមលោកលើកទី ២ មកម៉្លេះ។
ទំនាក់ទំនងរវាងចិន និងថៃ ដែលជាសម្ព័ន្ធយោធាចាស់វស្សារបស់អាមេរិកនៅតំបន់អាស៊ីអាគ្នេយ៍ ត្រូវបានពង្រឹងកាន់តែខ្លាំង ដោយសារតែទំនាក់ទំនងជាមួយអាមេរិក មានភាពរកាំរកូស ក្រោយរដ្ឋប្រហារយោធាឆ្នាំ២០១៤កន្លងមក។
រដ្ឋាភិបាលយោធាថៃ កាលពីខែមករាកន្លងមក បានអនុម័តទឹកប្រាក់ ៣៨០លានដុល្លារ សម្រាប់ទិញនាវាមុជទឹកមួយគ្រឿងពីប្រទេសចិន ហើយក៏កំពុងពិចារណាទិញនាវាមុជទឹក ៣គ្រឿងបន្ថែមទៀត៕