ប្រទេសចិន បាននិយាយនៅថ្ងៃនេះថា ការសម្រេចចិត្តរបស់ឥណ្ឌាក្នុងការរៀបចំទទួលមេដឹកនាំទីបេសម្ដេចសង្ឃ ដាឡៃ ឡាម៉ា នៅលើតំបន់ព្រំដែនប្រទាញប្រទង់គ្នារវាងឥណ្ឌា និងចិន នឹងបង្កឲ្យមានអន្តរាយធ្ងន់ធ្ងរ ទៅដល់ទំនាក់ទំនងរវាងប្រទេសទាំងពីរ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
សម្ដេចសង្ឃទីបេ ដាឡៃ ឡាម៉ា មានគម្រោងទៅទស្សនកិច្ចរយៈពេលមួយសប្ដាហ៍នៅតំបន់អារុណចាល ប្រាដេស ដែលជាតំបន់ភាគខាងកើតជួរភ្នំហិមាល័យគ្រប់គ្រងដោយប្រទេសឥណ្ឌា ប៉ុន្តែ ប្រទេសចិនអះអាងថា វាជាទឹកដីភាគខាងត្បូងរបស់ទីបេ។ គម្រោងដំណើរទស្សនកិច្ចរបស់សម្ដេចសង្ឃ ដាឡៃ ឡាម៉ា បានបង្កឲ្យចិនមានក្ដីបារម្ភយ៉ាងខ្លាំង ខណៈដែលក្រុងប៉េកាំងបានចាត់សម្ដេចសង្ឃ ដាឡៃ ឡាម៉ា ជាអ្នកដឹកនាំផ្ដាច់ទឹកដីដ៏គ្រោះថ្នាក់បំផុត។
អ្នកនាំពាក្យក្រសួងការបរទេសចិន អ្នកស្រី ហួ ឈុនយីង បានថ្លែងក្នុងសន្និសីទកាសែតដ៏ខ្លីមួយនៅទីក្រុងប៉េកាំងថា ចិនបង្ហាញជំហរប្រឆាំងទៅនឹងដំណើរទស្សនកិច្ចនេះ ហើយនឹងដាក់កំណត់ហេតុតវ៉ាកាទូតទៅភាគឥណ្ឌា។
អ្នកស្រីបន្ថែមថា ដោយហេតុថា ឥណ្ឌាមិនបានអើពើនឹងក្ដីបារម្ភរបស់ចិន និងនៅតែបន្តរៀបចំដំណើរទស្សនកិច្ចនោះ ឥណ្ឌាបានធ្វើឥ្យខូចខាតយ៉ាងធ្ងន់ធ្ងរដល់ផលប្រយោជន៍ចិន និងទំនាក់ទំនាក់ចិន-ឥណ្ឌា។
អ្នកនាំពាក្យចិនរូបនេះ បានទាមទារទៅឥណ្ឌា ឲ្យបញ្ឈប់ជាបន្ទាន់នូវការប្រើប្រាស់អកប្បកិរិយាខុសឆ្គងរបស់សម្ដេចសង្ឃ ដាឡៃ ឡាម៉ា ដើម្បីធ្វើឲ្យអន្តរាយដល់ផលប្រយោជន៍ចិន៕
អ្នកស្រីបន្តថា ការដែលឥណ្ឌាធ្វើដូច្នេះ មិនបានផ្ដល់ផលប្រយោជន៍ទៅដល់ឥណ្ឌាទេ ហើយប្រទេសចិននឹងចាត់វិធានការចាំបាច់នានា ដើម្បីការពារអធិបតេយ្យភាព និងសិទ្ធិស្របច្បាប់របស់ខ្លួន៕
