ចំនួនមនុស្សស្លាប់នៅក្នុងល្បាប់ភក់នៅភាគខាងត្បូងប្រទេសកូឡុំប៊ី បានកើនឡើងដល់ ២៩០នាក់ហើយនៅថ្ងៃនេះ ខណៈដែលក្រុមមន្ត្រីបានស៊ើបអង្កេតទៅលើវិធីបង្ការគ្រោះមហន្តរាយដ៏គួរឲ្យសង្វេគនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បន្ថែមទៅលើចំនួនអ្នកស្លាប់នេះ មនុស្ស ៣៣២នាក់ទៀត បានរងរបួស នៅក្នុងគ្រោះថ្នាក់រអិលបាក់ដី ដែលបានកប់បាត់ទីប្រជុំជន Mocoa របស់ប្រទេសនេះ ក្រោយពីមានទឹកជំនន់បណ្ដាលមកពីភ្លៀងធ្លាក់ជោគជាំប៉ុន្មានថ្ងៃជាប់ៗគ្នា។
ការរអិលបាក់ដីនោះ បានកើតឡើងកាលពីថ្ងៃសុក្រសប្ដាហ៍មុន ក្រោយពីភ្លៀងធ្លាក់ខ្លាំងក្លា បណ្ដាលឲ្យមានទឹកជំនន់យ៉ាងខ្លាំងនៅទន្លេចំនួន ៣ នាំមកនូវដុំថ្ម ដីភក់ និងកម្ទេចកម្ទីដើមឈើចាក់លុបលើតំបន់នោះ។
យោងតាមកាកបាទក្រហម បានឲ្យដឹងថា ទីក្រុង Mocoa គឺជាទីប្រមូលផ្ដុំទៅដោយមនុស្ស ៧ម៉ឺននាក់ ហើយមនុស្សប្រហែល ៤ម៉ឺន ៥ពាន់នាក់ បានទទួលផលប៉ះពាល់ពីគ្រោះមហន្តរាយនោះ៕