លោកអ៊ុង សានស៊ូជី ទីប្រឹក្សារដ្ឋាភិបាល និង ជារដ្ឋមន្ត្រីការបរទេសមីយ៉ាន់ម៉ា បានច្រានចោលចំពោះការចោទប្រកាន់ថា រដ្ឋាភិបាលនៃប្រទេសកំពុងតែធ្វើសកម្មភាពលុបបំបាត់ជនជាតិភាគតិចនៅក្នុងប្រទេសនេះតាមរូបភាពធ្វើទុក្ខម្នេញផ្សេងៗ។
ការប្រកាសច្រានចោលនេះ បន្ទាប់ពីក្រុមប្រឹក្សាផ្នែកសិទ្ធិមនុស្សរបស់អង្គការសហប្រជាជាតិ បានចោទប្រកាន់ពីការរំលោភសិទ្ធិមនុស្ស ហើយបញ្ជូនក្រុមការងារស៊ើបអង្កេតករណីយោធាធ្វើទុក្ខលើជនជាតិភាគតិច។
លោកស្រី អ៊ុង សានស៊ូជី ថ្លែងក្នុងបទសម្ភាសន៍ជាមួយសារព័ត៌មានBBCកាលពីថ្ងៃពុធម្សិលមិញថា អ្វីដែលកំពុងកើតឡើងនៅក្នុងប្រទេសមីយ៉ាន់ម៉ានោះ មិនមែនជាការចង់លុបបំបាត់ជនជាតិភាគតិចនោះទេ។
រដ្ឋាភិបាលស៊ីវិលថ្មីរបស់មីយ៉ាន់ម៉ា ដែលទើបកើតឡើងជា១ឆ្នាំនេះ ប្រឈមមុខនឹងការថ្កោលទោសពីសហគមន៍អន្តរជាតិករណីការបង្ក្រាបលើជនជាតិភាគរ៉ូហ៊ីងយ៉ាកាន់សាសនាឥស្លាម ដែលគេចោទថា ជាក្រុមជនអន្តោប្រវេសខុសច្បាប់ចេញពីប្រទេសបង់ក្លាដេស។ ក្រុមប្រឹក្សាសិទ្ធិមនុស្សអង្គការសហប្រជាជាតិបានចាត់ក្រុមការងារដើម្បីស៊ើបអង្កេតលើករណីទាំងនេះ។
ក្រុមអ្នកស៊ើបអង្កេតពីអង្គការសហប្រជាជាតិនេះ នឹងផ្តោតលើករណីចោទថា មានការធ្វើទារុណកម្ម ការសម្លាប់ និង រំលោភផ្លូវភេទ ដែលបង្កឡើងដោយពួកយោធា។
លោកស្រីថា ភាគច្រើនករណីទាំងនោះជាការប៉ះទង្គិចគ្នា នៅកន្លែងដែលជនជាតិរ៉ហ៊ីងយ៉ាងរស់នៅជាង១លាននាក់នៅភាគខាងលិចនៃរដ្ឋរ៉ាឃីនគឺថា មិនមែនជាសកម្មភាពលុបបំបាត់ជនជាតិភាគតិចនោះទេ។