នគរបាលនៅភាគខាងជើងនៃប្រទេសឥណ្ឌា កំពុងស្វែងរកក្នុងបញ្ជីឈ្មោះឪពុកម្តាយដែលបាត់កូន ដើម្បីកំណត់អត្តសញ្ញាណក្មេងស្រីម្នាក់ដែលរស់នៅជាមួយសត្វស្វា ហើយត្រូវបានជួយសង្គ្រោះ។
ក្មេងស្រីតូចមួយ អាយុចន្លោះពី៨ទៅ១០ឆ្នាំ ត្រូវបានប្រទះឃើញកាលពីប៉ុន្មានសប្តាហ៍មុន នៅក្នុងព្រៃមួយជិតរដ្ឋ Uttar Pradesh ហើយត្រូវបានគេជួយសង្គ្រោះចេញពីហ្វូងសត្វស្វា។ វេជ្ជបណ្ឌិតថ្លែងថា ក្មេងស្រីនោះមិនអាចនិយាយទំនាក់ទំនងគ្នាបានទេគឺនាងមានកាយវិការដូចជាសត្វស្វា។ នេះបើតាមសារព័ត៌មាន BBC។
មន្ត្រីជាន់ខ្ពស់នគរបាលបានថ្លែងថា ក្មេងស្រីនោះកំពុងលេងជាមួយសត្វស្វាជាច្រើន ហើយមានអាកប្បកិរយាដូចសត្វស្វាដែរពេលដែលនគរបាលព្យាយាមជួយសង្គ្រោះ។
ក្មេងស្រីនោះត្រូវបានប្រទះឃើញដោយអ្នកភូមិនៅព្រៃធំមួយនៅ Katarniaghat ដែលតំបន់នេះនៅជាប់ព្រំដែនរវាងនេប៉ាល់ និង ឥណ្ឌា។
នគរបាលនិយាយថា ពេលដែលពួកចូលជួយយកក្មេងស្រីនោះពីក្រុមសត្វស្វាត្រូវបានហ្វូងស្វាតាមខាំ។ ក្មេងស្រីនោះមានបញ្ហាសុខភាព ដោយសារបរិភោគអាហារមិនគ្រប់គ្រាន់ ពេលយកចេញពីហ្វូងសត្វស្វាភ្លាមនាងមានសក់វែង និង ស្នាមក្រចកជាច្រើននៅលើខ្លួននាង។
រហូតដល់ពេលនេះនាងនៅតែមិនអាចនិយាយកើត តែយល់ពីកាយវិការមួយចំនួនពីមនុស្សជុំវិញខ្លួនវេជ្ជបណ្ឌិតថា នាងមានភាពប្រសើរឡើងច្រើនហើយ។ ចំណែកឪពុកម្តាយនាងនៅមិនទាន់រកឃើញនៅឡើយ៕