របាយការណ៍បឋមរបស់អង្កេតការណ៍បានបញ្ជាក់ថា ក្នុងហេតុការណ៍អាមេរិកបាញ់មីស៊ីលប្រមាណ៥០គ្រាប់ទៅកាន់មូលដ្ឋានទ័ពរបស់ស៊ីរីនោះ បានបណ្តាលឲ្យទាហានស៊ីរី៤នាក់បានស្លាប់។
ក្រុមអ្នកតាមដានបញ្ជាក់ថា ហេតុការណ៍នេះ បណ្តាលឲ្យទាហាន៤នាក់ស្លាប់ និង មានការខូចខាតដល់សម្ភារសម្រាប់ធ្វើសង្គ្រាមផ្សេងៗទៀត។នេះបើតាមការអះអាងរបស់អ្នកអង្កេតការណ៍សិទ្ធិមនុស្សនៅស៊ីរី ហើយត្រូវចុះផ្សាយដោយសារព័ត៌មាន Channel News Asia។
សហរដ្ឋអាមេរិកបានបើកការវាយប្រហារនៅថ្ងៃនេះជាការឆ្លើយតប និង ស៊ីរីដែលបានបាញ់អាវុធគីមីលើក្រុមប្រឆាំងកាលពីថ្ងៃអង្គារ ហើយបានបណ្តាលឲ្យជនស៊ីវិលជាង៧០នាក់បានស្លាប់ ក្នុងនោះមានកុមារ២០។
កាលពីម្សិលមិញអ្នកការទូតរបស់អាមេរិកប្រចាំនៅអង្គការសហប្រជាជាតិបានព្រមានថា បើអង្គការអន្តរជាតិមួយនេះមិនមានវិធានការទប់ស្កាត់ការសម្លាប់មនុស្សនៅស៊ីរីទេ អាមេរិកនឹងចេញប្រតិបត្តិការដោយឯកតោភាគីដើម្បីដោះស្រាយបញ្ហានេះ៕