ប្រធានាធិបតីហ្វីលីពីនលោក រ៉ូទ្រីហ្គោ ឌូទើតេ ថ្លែងនៅថ្ងៃចន្ទនេះថា លោកបានបញ្ជាឲ្យយោធាពង្រឹងការគ្រប់គ្រងតំបន់មានជម្លោះនៅសមុទ្រចិនខាងត្បូងដែលស្ថិតនៅជាកម្មសិទ្ធិរបស់ហ្វីលីពីន ហើយបញ្ជាក់ជាមួយចិនថា មិនបង្កភាពតានតឹងផ្នែកអាវុធនោះទេ។
លោក ឌូទើតេ ថ្លែងថា ហ្វីលីពីនចង់រក្សាសន្តិភាពនិងមិត្តភាពជាមួយចិន ប៉ុន្តែថាប្រទេសរបស់លោកត្រូវការពារដែនអធិបតេយ្យភាពនៅតំបន់មានជម្លោះនៅកោះស្ព្រាតលី ខណៈប្រទេសផ្សេងៗកំពុងដណ្តើមគ្នាកាន់កាប់យកដែនកោះនិងថ្មប៉ប្រះទឹកនៅតំបន់នោះ។
រដ្ឋមន្ត្រីក្រសួងការពារជាតិនិងយោធាហ្វីលីពីនបញ្ជាក់ថា ពួកគេមានគម្រោងរៀបចំការគ្រប់គ្រងលើចំណែកជាកម្មសិទ្ធិនៅទីនោះឲ្យបានរឹងមាំ។
លោក ឌូទើតេ ថាលោកបញ្ជាក់ឲ្យមានការកាន់កាប់លើកោះប្រមាណចំនួន១០ឬ៩ប៉ុណ្ណោះ ដែលកោះទាំងនោះនៅជិតឆ្នេរ ដើម្បីពង្រឹងការគ្រប់គ្រងភូមិសាស្ត្រ។
ថ្មីៗនេះមានការផ្សព្វផ្សាយថា ប្រធានាធិបតីហ្វីលីពីនបានបញ្ជាឲ្យទាហានរបស់លោកទៅគ្រប់គ្រងកន្លែងមានជម្លោះនៅសមុទ្រចិនខាងត្បូង ហើយរូបលោកផ្ទាល់នឹងទៅត្រួតពិនិត្យកន្លែងនៅថ្ងៃបុណ្យឯករាជ្យជាតិនៅក្នុងខែមិថុនាខាងមុខ៕