របាយការណ៍បឋមបង្ហាញថា ហិង្សានៅដែនដីកាស្មៀ នៅចំពេលបោះឆ្នោតស្ទង់មតិនៅថ្ងៃនេះ បានបណ្តាលឲ្យមានអ្នកស្លាប់៦នាក់និងរងរបួសជាច្រើននាក់ទៀត។
ទាហានប៉ារ៉ា បានបាញ់លើក្រុមបាតុករដោយប្រើគ្រាប់កៅស៊ូនិងគ្រាប់ពិត ខណៈពួកអ្នកតវ៉ាបានចោលដុំថ្មលើការិយាល័យបោះឆ្នោតនៅជិតរដ្ឋ Srinagar របស់ឥណ្ឌា។ នេះបើតាមសារព័ត៌មាន BBC។
ក្រុមមេដឹកនាំចលនាផ្តាច់ខ្លួនជាច្រើនបានអំពាវនាវឲ្យពលរដ្ឋធ្វើពហិការកុំទៅចូលរួមបោះឆ្នោត។ ការបោះឆ្នោតនេះ ដើម្បីស្ទង់មតិពីកម្រិតនៃការចង់បានរបស់ពលរដ្ឋនៅតំបន់នោះ ក្នុងការស្ថិតនៅក្រោមការគ្រប់គ្រងរបស់ឥណ្ឌា។
កាស្មៀជាតំបន់ដែលមានអ្នកកាន់សាសនាឥស្លាមភាគច្រើនរស់នៅ ហើយជាកន្លែងដែលឥណ្ឌា និង ប៉ាគីស្ថានបានដណ្តើមគ្នាកាន់កាប់ច្រើនទសវត្សរ៍មកហើយ។ ប្រទេសទាំងពីបានចូលកាន់កាប់ផ្នែកផ្សេងៗគ្នានៃតំបន់នោះ។
ឥណ្ឌាបានចោទប្រកាន់ថា ប៉ាគីស្ថានជាអ្នកបង្កើតឲ្យមានក្រុមផ្តាច់ខ្លួនបះបោរធ្វើសកម្មភាពនៅទីនោះ ប៉ុន្តែខាងប៉ាគីស្ថានបានបដិសេធ។
តំបន់នោះកើតមានភាពតានតឹងខ្លាំងឡើងវិញតាំងពីខែកក្កដាឆ្នាំ២០១៦ ក្រោយពេលកម្លាំងរបស់ឥណ្ឌាបានសម្លាប់មេដឹកនាំបះបោរនៅកាស្មៀដែលមានឥទ្ធិពលឈ្មោះ Burhan Wani៕