មន្ត្រីតំណាងប្រទេសរបស់មូនិធិកុមារនៃអង្គការសហប្រជាជាតិកំពុងស្វែងរកការអន្តរាគមន៍ឲ្យមានការដោះលែងកុមារជនជាតិភាគតិចរ៉ូហ៊ីងយ៉ា ដែលចាប់ឃុំដោយយោធាមីយ៉ាន់ម៉ា។
កុមារ១០នាក់ ក្នុងចំណោមរាប់រយនាក់ផ្សេងទៀតដែលកំពុងជាប់ឃុំ ត្រូវបានចោទប្រកាន់ពីបទធ្វើសកម្មភាពផ្តាច់ខ្លួន។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រ ចុះផ្សាយកាលពីខែមុន។
ចំណែកកុមារប្រមាណ៣០នាក់ ក្នុងចំណោមជាង៤០០នាក់ដែលចាប់ឃុំខ្លួនតាំងពីថ្ងៃទី៩ខែតុលា ពេលដែលមានការវាយប្រហារប៉ុស្តិ៍នគរបាលចំនួន៣ជាប់ព្រំដែនជាមួយបង់ក្លាដេសក៏ត្រូវបានចោទប្រកាន់ពីការធ្វើសកម្មភាពបះបោរផ្តាច់ខ្លួនដែរ។
ចាប់តាំងពីមានករណីហិង្សានៅភាគជើងនៃប្រទេសមីយ៉ាន់ម៉ា គឺប្រជាពលរដ្ឋជនជាតិភាគតិចរ៉ូហ៊ីងយ៉ាប្រមាណ៧៥ ០០០នាក់ បាននាំគ្នារត់គេចទៅប្រទេសបង់ក្លេសចេញពីការធ្វើបាបពីសំណាក់យោធាមីយ៉ាន់ម៉ា។ ជនជាតិភាគតិចទាំងនោះចោទថា យោធា បានដុតផ្ទះ ធ្វើទារុណកម្ម សម្លាប់ និងរំលោភផ្លូវភេទ។
បញ្ហានេះត្រូវលើកឡើងពិភាក្សាក្នុងកម្រិតថ្នាក់ខ្ពស់មួយរបស់ UNICEF ដើម្បីជំរុញឲ្យភាគីពាក់ព័ន្ធបានដឹង និងដោះស្រាយបញ្ហាទាំងនេះឲ្យបានឆាប់៕