អាជ្ញាធរហ្វីលីពីន និយាយថា មនុស្ស ៨នាក់ មានទាំងជនសង្ស័យជាពួកឧទ្ទាមអាប៊ូសាយ៉ាហ្វ ៥នាក់ និងមន្ត្រី ៣នាក់ ត្រូវបានគេសម្លាប់នៅថ្ងៃនេះ នៅក្នុងការប៉ះទង្គិចនានាជាមួយក្រុមចាប់ជំរិត នៅលើកោះលម្ហែកាយបូហូល។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អំពើបាញ់ប្រហារគ្នានោះ បានក្លាយទៅជាការបាញ់ប្រហារជាលើកដំបូងបង្កឡើងដោយក្រុមអាប៊ូសាយាហ្វ នៅលើទីតាំងទេសចរណ៍ដ៏ធំមួយរបស់ហ្វីលីពីន នៅក្នុងរយៈពេលប៉ុន្មានឆ្នាំថ្មីៗនេះ។ ក្រុមអាប៊ូសាយាហ្វ ជាយូរមកហើយ តែងតែជាប់ពាក់ព័ន្ធនឹងការចាប់ជំរិតមនុស្សយកប្រាក់ ដោយផ្ដោតលើជនបរទេស នៅភាគខាងត្បូងប្រទេសហ្វីលីពីន។
អ្នកនាំពាក្យយោធាហ្វីលីពីន លោក អែដហ្កាដ អារ៉េវ៉ាឡូ បាននិយាយថា លោកបានទទួលសេចក្ដីរាយការណ៍ថា សត្រូវ ៥នាក់ ត្រូវបានសម្លាប់ ហើយរឹបអូសបានកាំភ្លើងយន្ត ៤គ្រឿងពីក្រុមឧទ្ទាម។ ប៉ុន្តែ លោកថា មនុស្ស ៣នាក់របស់រដ្ឋាភិបាល ក៏ត្រូវបានសម្លាប់ផងដែរ ខណៈមន្ត្រី ២នាក់ទៀតរងរបួស។
ការប៉ះទង្គិចនេះ បានកើតឡើងក្រោយពីស្ថានទូតអាមេរិក និងអូស្ត្រាលី បានព្រមានទៅពលរដ្ឋរបស់ពួកគេនៅសប្ដាហ៍នេះ អំពីការចាប់ជំរិតបង្កឡើងដោយក្រុមភេរវជន នៅភាគកណ្ដាលហ្វីលីពីន។
កោះបូហូល គឺជាមរណីយដ្ឋានទេសចរណ៍ដ៏ធំមួយ ជាទីដែលភ្ញៀវទេសចរហែលទឹកប្រលែងលេងជាមួយត្រីឆ្លាមរូបរាងបាឡែន និងជិះទូកកម្សាន្តលើទឹកទន្លេថ្លាដូចកញ្ចក់ ព្រមទាំងឆ្នេរខ្នាច់សចិញ្ចាច៕
