អនុរដ្ឋមន្ត្រីសន្តិសុខជាតិម៉ាឡេស៊ី បានថ្លែងនៅថ្ងៃនេះថា ប្រទេសលោកគួរតែស៊ើបអង្កេតទៅលើការផ្ទេរមូលនិធិទៅមេដឹកនាំកូរ៉េខាងជើង បន្ទាប់ពីទីភ្នាក់ងារព័ត៌មាន Reuters បានចុះផ្សាយថា ប្រធានក្រុមហ៊ុនធំមួយរបស់ម៉ាឡេស៊ី បានផ្ដល់លុយអស់រយៈពេលជាច្រើនឆ្នាំមកហើយទៅក្រុងព្យុងយ៉ាង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានដកស្រង់សម្ដីអ្នកចុះចូលជាជនជាតិកូរ៉េខាងជើងម្នាក់ ដែលបាននិយាយថា លោក ហាន ហ៊ុនអ៊ីល នាយកស្ថាបនិកនៃក្រុមហ៊ុនដៃគូម៉ាឡេស៊ី-កូរ៉េ MKP បានផ្ដល់លុយទៅក្បាលម៉ាស៊ីនដឹកនាំក្រុងព្យុងយ៉ាង គណៈកម្មាធិការកណ្ដាលបក្សពលករ អស់រយៈពេល ២ទសវត្សរ៍មកហើយ។
ធនាគារបុត្រសម្ព័ន្ធរបស់ក្រុមហ៊ុន MKP នៅទីក្រុងព្យុងយ៉ាង ក៏ស្ថិតនៅក្រោមការស៊ើបអង្កេតពីអង្គការសហប្រជាជាតិ ដែលសង្ស័យថា អាចរំលោភលើទណ្ឌកម្មនានា ដែលបានហាមឃាត់ក្រុមហ៊ុនបរទេស មិនឲ្យបង្កើតក្រុមហ៊ុនរួមគ្នា ឬក៏កាន់កាប់ជាម្ចាស់កម្មសិទ្ធិធនាគារកូរ៉េខាងជើង។
អនុរដ្ឋមន្ត្រីសន្តិសុខជាតិ លោក នួរ ហ្សាស់ឡាន់ មូហាមេដ បានថ្លែងថា ដំណឹងស្ដីពីការផ្ទេរលុយទៅឲ្យរបបក្រុងព្យុងយ៉ាង បានបង្កអន្តរាយដល់កេរ្តិ៍ឈ្មោះរបស់ទីក្រុងគួឡាឡុំពួរ ក្នុងឋានៈជាមជ្ឈមណ្ឌលហិរញ្ញវត្ថុ។ លោកក៏បានអំពាវនាវទៅធនាគារកណ្ដាលម៉ាឡេស៊ី ឲ្យស៊ើបអង្កេតរកមើលថា តើមានការប្រើប្រាស់ប្រព័ន្ធធនាគារនៅម៉ាឡេស៊ីដោយមិនត្រឹមត្រូវមែនឬយ៉ាងណា។
ប៉ុន្តេ ធនាគារកណ្ដាលម៉ាឡេស៊ី មិនទាន់អាចបកស្រាយបានភ្លាមៗទៅនឹងបញ្ហានេះនៅឡើយទេ៕