ប្រធានាធិបតីស្ដីទីរបស់កូរ៉េខាងត្បូង នៅថ្ងៃនេះ បានព្រមានអំពីទង្វើបង្កហេតុកាន់តែខ្លាំងថែមទៀតបង្កឡើងដោយកូរ៉េខាងជើង ខណៈដែលភាពតានតឹងនៅឧបទ្វីបកូរ៉េ កំពុងកើនឡើងខ្លាំង ជុំវិញក្ដីបារម្ភថា កូរ៉េខាងជើងអាចសាកល្បងសព្វាវុធរបស់ខ្លួនជាថ្មីទៀតនាពេលខាងមុខនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្រុមពិឃាតនៃកងទ័ពជើងទឹកអាមេរិកដែលនាំមុខដោយនាវាដឹកយន្តហោះចម្បាំង កំពុងស្ថិតនៅលើដំណើរឆ្ពោះទៅមហាសមុទ្រប៉ាស៊ីហ្វិកខាងលិច បន្ទាប់ពីអាមេរិកបើកការវាយប្រហារទៅលើប្រទេសស៊ីរីកាលពីសប្ដាហ៍មុន។
ប្រធានាធិបតីស្ដីទីកូរ៉េខាងត្បូង លោក ហ្វាង ក្យូអាញ់ បានបញ្ជាកងទ័ពឲ្យឃ្លាំមើលសកម្មភាពរបស់កូរ៉េខាងជើង និងរក្សាទំនាក់ទំនងជិតដិតនឹងសម្ព័ន្ធមិត្តសហរដ្ឋអាមេរិក។
លោក ហ្វាង ដែលកាន់តួនាទីប្រធានាធិបតីក្រោយអតីតប្រធានាធិបតីអ្នកស្រី ផាក ហ្គឹនហេ ត្រូវបានបណ្ដេញចេញពីអំណាចនោះ បានថ្លែងថា វាអាចទៅរួចថា កូរ៉េខាងជើងអាចបង្កទង្វើគឃ្លើនកាន់តែខ្លាំង ដូចជា សាកល្បងនុយក្លេអ៊ែរ នៅចំពេលរដ្ឋឯកោមួយនេះរៀបចំពិធីរំលឹកខួបផ្សេង៕
