មេបញ្ជាការនៅមន្ទីរប៉ង់តាហ្គោនជាទីបញ្ជាការដ្ឋានកងទ័ពអាមេរិកលោក Jim Mattis បានថ្លែងនៅថ្ងៃចន្ទម្សិលមិញថា ទ័ពអាមេរិកបានវាយបំផ្លាញមូលដ្ឋានទ័ពអាកាសទី៥ របស់រដ្ឋអំណាចទីក្រុងដាម៉ាស ដែលទីក្រុងវ៉ាស៊ីនតោនបញ្ជាក់ថា គ្រាន់តែជាការវាយព្រមានដល់ប្រធានាធិបតី Bashar al-Assad។
ការវាយតម្លៃជាសាធារណៈអំពីការវាយប្រហារដោយមីស៊ីលកាលពីថ្ងៃសុក្រ ដែលមានការចូលរួមប្រជុំពីរដ្ឋមន្ត្រីការបរទេសពីប្រទេសមានសេដ្ឋកិច្ចរីកចម្រើន G7 នៅក្នុងប្រទេសអ៊ីនតាលី បានផ្ញើសារពីភាពច្បាស់លាស់ និង គាំទ្រការវាយប្រហារនេះទៅកាន់ប្រទេសរុស្ស៊ី ដែលគាំទ្ររដ្ឋអំណាចទីក្រុងដាម៉ាស។ នេះបើតាមទីភ្នាក់ងារព័ត៌មាន AFP។
សហរដ្ឋអាមេរិកកាលពីថ្ងៃសុក្របាន បាញ់មីស៊ីល Tomahawk ៥៩គ្រាប់ ទៅលើមូលដ្ឋានទ័ពអាកាសរបស់ស៊ីរីនៅជិតទីក្រុងហូម។ សកម្មភាពនេះទីក្រុងវ៉ាស៊ីនតោនថា ជាការតបនឹងយន្តហោះចម្បាំងរបស់អាសាទប្រើប្រាស់អាវុធគីមីវាយប្រហារលើជនស៊ីវិល និង ក្រុមបះបោរនៅក្នុងខេត្ត Idlib ដែលបណ្តាលឲ្យមនុស្សជាង៧០នាក់បានស្លាប់។
លោក Jim Mattis ថ្លែងថា សហរដ្ឋអាមេរិក និង មិននៅស្ងៀមទេ ករណីរដ្ឋាភិបាលអាសាទប្រើប្រាស់អាវុធគីមី សម្លាប់មនុស្សដែលហាមដោយច្បាប់អន្តរជាតិ។ លោកបញ្ជាក់ថា ប្រតិបត្តិការផ្លូវអាកាសរបស់ស៊ីរីជាង២០%ត្រូវបានបំផ្លាញ៕