កាសែតចិន បានចុះផ្សាយនៅថ្ងៃនេះថា កូរ៉េខាងជើងគួរតែផ្អាកផែនការផលិតអាវុធនុយក្លេអ៊ែរ និងមីស៊ីល ដើម្បីសន្តិសុខរបស់ខ្លួន ដែលនេះគឺជាការព្រមានថា សហរដ្ឋអាមេរិកកំពុងតែបង្ហាញជំហរច្បាស់ថា អាមេរិកមិនមានមានគម្រោងសន្តិសហវិជ្ជមានជាមួយក្រុងព្យុងយ៉ាងនោះឡើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ប្រព័ន្ធផ្សព្វផ្សាយកូរ៉េខាងជើង ព្រមានអំពីការប្រើប្រាស់អាវុធនុយក្លេអ៊ែរវាយប្រហារទៅលើអាមេរិក ប្រសិនបើមានសញ្ញាណាមួយបញ្ជាក់ពីទង្វើឈ្លានពានរបស់អាមេរិក ខណៈដែលកងកម្លាំងពិឃាតនៃកងទ័ពជើងទឹកអាមេរិក កំពុងធ្វើដំណើរទៅមហាសមុទ្រប៉ាស៊ីហ្វិកខាងលិច។
លោក ត្រាំ ដែលបានជំរុញចិនឲ្យដាក់គំនាបបន្ថែមទៀតលើរដ្ឋឯកោក្រីក្រកូរ៉េខាងជើងនោះ បាននិយាយថា កូរ៉េខាងជើងនឹងបង្កើតបញ្ហា ហើយអាមេរិកនឹងដោះស្រាយបញ្ហាដោយមាន ឬដោយមិនមានជំនួយរបស់ចិន។
កាសែតចិន Global Time បានផ្សាយថា ឧបទ្វីបកូរ៉េ មិនទាន់ឈានដល់ការផ្ទុះអាវុធនោះឡើយ ចាប់តាំងពីកូរ៉េខាងជើងបានសាកល្បងគ្រាប់បែកនុយក្លេអ៊ែរលើកដំបូងរបស់ខ្លួនកាលពីឆ្នាំ២០០៦។
ចំណែកកាសែត People’s Daily បានផ្សាយថា ក្រុងវ៉ាស៊ីងតោន មិនត្រឹមតែមានទំនុកចិត្ត និងមានមោទនភាពទៅលើការវាយប្រហារប្រទេសស៊ីរីប៉ុណ្ណោះទេ ប៉ុន្តែ លោក ត្រាំ ក៏ត្រូវបានគេចាត់ទុកជាបុរសម្នាក់ដែលឲ្យតម្លៃលើពាក្យសន្យារបស់លោកផងដែរ។
កាសែតនេះបន្ថែមថា អាមេរិកច្បាស់ណាស់ថា នឹងបញ្ឈប់កូរ៉េខាងជើងមិនឲ្យធ្វើការសាកល្បងគ្រាប់បែកនុយក្លេអ៊ែរបន្ថែមទៀតនោះឡើយ៕