លោក លី ជំរុញឲ្យចិននិងអឺរ៉ុបពង្រឹងការធ្វើពាណិជ្ជកម្មដោយសេរីនិងតម្លាភាព

នាយករដ្ឋមន្ត្រីចិន លោក Li Keqiang ថ្លែងថា ចិន និង សហភាពអឺរ៉ុប គួរតែមានការផ្សព្វផ្សាយពង្រឹងការធ្វើពាណិជ្ជកម្មដោយសេរី និង តម្លាភាពក្នុងការធ្វើពាណិជ្ជកម្ម ដែលបង្ហាញពីសញ្ញាវិជ្ជមាន។​

នាយករដ្ឋមន្ត្រីចិនបានថ្លែងបែបនេះទៅមន្ត្រីសហភាពអឺរ៉ុប។​ លោក Li ថ្លែងកាលពីថ្ងៃអង្គារម្សិលមិញថា ចិន និង សហភាពអឺរ៉ុប គឺជាភាគីពីរដែលមានឥទ្ធិពលលើសេដ្ឋកិច្ចខ្លាំងបំផុតលើពិភពលោក ហើយអាចឆ្លើយតបបញ្ហាប្រឈមរបស់ពិភពលោក​ ការធ្វើកំណែទម្រង់ និង ធ្វើឲ្យមានភាពប្រសើរឡើងនៃប្រព័ន្ធអភិបាលកិច្ចនៅលើឆាកអន្តរជាតិ។ ដោយឈរលើឥទ្ធិពលចិន និងសហភាពអឺរ៉ុប​ខ្លាំងបែបនេះទើបនាយករដ្ឋមន្ត្រីចិនជំរុញឲ្យភាគីទាំងពីរ ជំរុញការធ្វើពាណិជ្ជកម្មប្រកបដោយភាពសេរី និង យុត្តិធម៌។​

នាយករដ្ឋមន្ត្រីចិនបន្តថា ភាគីទាំងពីរគួរតែឆ្លើយតបការផ្លាស់ប្តូរ ពីភាពមិនច្បាស់លាស់ នៃស្ថានភាពអន្តរជាតិ ក្នុងកិច្ចសហប្រតិបត្តិការ និង ស្ថិរភាពនៃទំនាក់ទំនងរវាងចិននិងសហភាពអឺរ៉ុប។​ លោកថ្លែងបែបនេះ ខណៈមន្ត្រីរបស់សហភាពអឺរ៉ុបធ្វើដំណើរទៅបំពេញទស្សនកិច្ចនៅចិន។​

អ្នកការទូតរបស់សហភាពអឺរ៉ុបមួយចំនួនបាននិយាយថា ចិន​ចាប់ផ្តើមពង្រឹងទំនាក់ទំនងជាមួយជាមួយអឺរ៉ុបកាន់តែខ្លាំងចាប់តាំងពី ប្រធានាធិបតីអាមេរិកលោក ដូណល ត្រាំ ចូលកាន់តំណែងកាលពីដើមឆ្នាំ២០១៧មក។ គឺមានការព្រួយបារម្ភខ្លាចអាមេរិកដណ្តើមយកសម្ព័ន្ធមិត្តនានា ខណៈដែលលោក ត្រាំ បង្ហាញគោលនយោបាយផ្តល់អាទិភាពមុនគេក្នុងការគិតគួរដល់ប្រជាពលរដ្ឋនិង ជាតិសាសន៍ខ្លួន៕