រដ្ឋមន្ត្រីការបរទេសអាមេរិក លោក Rex Tillerson ថ្លែងថា អាមេរិកកំពុងស្វែងរកមធ្យោបាយក្នុងការដាក់សម្ពាធ លើកូរ៉េខាងជើង ជុំវិញកម្មវិធីអាវុធនុយក្លេអ៊ែ ខណៈបណ្តាញព័ត៌មានរដ្ឋកូរ៉េខាងជើងព្រមានថា នឹងឆ្លើយតបដោយបច្ចេកទេសអាវុធវិញយ៉ាងខ្លាំងក្លា ហើយព្រមានអាមេរិកថា កុំបង្កភាពរញ៉េរញ៉ៃពេក។
ប្រធានាធិបតីអាមេរិកលោក ដូណល ត្រាំ បានដាក់វិធានការតឹងរឹង លើមេដឹកនាំកូរ៉េខាងជើងលោក គីម ជុងអ៊ុន ដែលជំរុញឲ្យសម្ព័ន្ធមិត្តកូរ៉េខាងជើងគឺ ភាគីចិន ឲ្យជួយដាក់សម្ពាធបន្ថែមតាមការដាក់ទណ្ឌកម្មរបស់អង្គការសហប្រជាជាតិ។
ទោះយ៉ាងណាកូរ៉េខាងជើងនៅតែព្រមានជាធម្មតាក្នុងការវាយប្រហារលើសហរដ្ឋអាមេរិក និង សម្ព័ន្ធមិត្តពីរទៀតគឺ ជប៉ុន និង កូរ៉េខាងត្បូង ដែលការព្រមាននោះធ្វើឡើងបន្ទាប់ពីការបាញ់មីស៊ីលបរាជ័យកាលពីថ្ងៃអាទិត្យ ក្រោយពេលមួយថ្ងៃដែលរៀបចំក្បួនទ័ពទ្រង់ទ្រាយធំនៅទីក្រុងព្យុងយ៉ាង។នេះបើតាមទីភ្នាក់ងារព័ត៌មានរ៉យទ័រ។
រដ្ឋមន្ត្រីការបរទេសអាមេរិក ថ្លែងប្រាប់អ្នកសារព័ត៌មាននៅទីក្រុងវ៉ាស៊ីនតោនកាលពីថ្ងៃពុធម្សិលមិញថា អាមេរិកកំពុងតែតាមដានសកម្មភាពរបស់កូរ៉េខាងជើង គឺដើម្បីរកឱកាសនៃការដាក់សម្ពាធលើរដ្ឋអំណាចរបស់លោក គឺម ជុងអ៊ុន៕