ក្រោយដឹកសពភរិយាទៅដល់ស្រុកកំណើត ដែលស្ថិតនៅភូមិខ្វាវ ស្រុកសំរោង ខេត្តតាកែវ លោក រិន សាវ៉េតត្រូវគេកត់សម្គាល់បានប្រារព្ធពិធីបុណ្យសពក្នុងរូបភាពអត្តខាត់មិនសូវជាហ៊ឹកហ៊ាក់ប៉ុន្មានទេ បើធៀបនឹងកេរ្តិ៍ឈ្មោះរបស់លោកដែលជាតារាចម្រៀងល្បីម្នាក់។ លោកបានប្រកាសថាមិនតូចចិត្តទេ ផ្ទុយទៅវិញលោកមានតែខំញញឹម និងសប្បាយចិត្តឈប់យំទៀតហើយ ដើម្បីអោយវិញ្ញាណខន្ធរបស់ភរិយាបានស្ងប់។
លោកថាកាលពីឆ្នាំ២០១៣ ភរិយារបស់លោក ឈ្មោះ គង់ សាវី បានកើតជំងឺដុំគីសគួរអោយកត់សម្គាល់មួយលើទ្រូងស្ដាំ ដោយក្នុងពេលនោះទាំងលោកនិងភរិយាហាក់មិនសូវចាប់អារម្មណ៍នោះទេ ដោយសារតែដុំសាច់នោះមិនបានធ្វើទុក្ខ។
ម្យ៉ាងមកពីលោកនៅក្នុងពេលនោះរកចំណូលបានត្រឹមតែម៉ាគ្រប់ៗ មិនសល់ដល់២បីរយដុល្លារសម្រាប់ចូលពេទ្យនោះផង ទើបចេះតែរង់ចាំមួយថ្ងៃហើយមួយថ្ងៃទៀត។
លោកសារភាពថាហេតុផលដែលនាំអោយភរិយាធ្លាក់ខ្លួនដល់ដំណាក់កាលធ្ងន់ធ្ងរ គឺដោយសារតែលោករវល់ច្រៀងព្រលឹមចេញព្រលប់ចូល ហើយមិនសូវបានយកចិត្តទុកដាក់ក្នុងការជូនអ្នកស្រីទៅពិនិត្យ។
លោកនិយាយថា «ក្នុងពេលដុំគីសភរិយាខ្ញុំឡើងធំ ទើបខ្ញុំបានយកទៅពិនិត្យ ហើយក៏មិនបានយកទៅពេទ្យល្អអីដែរ ទើបដុំសាច់ហ្នឹងវាចេះតែរីកធំទៅៗ បានខ្ញុំគាត់ស្វះស្វែងរកពេទ្យមែនទែន!»។ លោកសារភាពថាភរិយាមិនសូវរន្ធើន ទើបបណ្ដាលអោយលោកចេះតែប្រហែស និងជាហេតុដែលនាំអោយជំងឺដុំគីសប្រែក្លាយជាជំងឺមហារីកនិងរីករាលដាលខ្លាំង។ គាប់ជួនជាភរិយាចាប់ផ្ដើមធ្វើទុក្ខក្នុងពេលការងារសិល្បៈធ្លាក់ចំណូលនោះផងទើបស្ថានភាពធ្វេសប្រហែសចេះតែកើតមានឡើង។
លោកថាភរិយាចាប់ផ្ដើមឈឺធ្ងន់កាលពីចុងឆ្នាំ២០១៦ ដោយលោកបានចាត់ទុកថាជំងឺដែលបានធ្វើទុកនៅក្នុងពេលនោះបានធ្លាក់ដល់កម្រិតហួសពេលទៅហើយ ទម្រាំលោកទទួលបានឱកាសទៅព្យាបាលដោយឥតគិតថ្លៃនៅមន្ទីរពេទ្យរុស្ស៊ីកាលពីដើមឆ្នាំ២០១៧អោយភរិយា។
លោកថាជំងឺមហារីករបស់ភរិយាបានរីករាលដាលពីដើមទ្រូង ដល់ខួរឆ្អឹង ដល់ស្មារខាងធ្វេង និងចុងក្រោយគឺខួរក្បាលបណ្ដាលអោយជ្រុះសក់ ដោយមុនចែកចែកឋាន ភរិយាលោកមានអាការៈហត់ៗ ចុកផ្នែកស្មារខាងធ្វេង និងធ្វើទុក្ខសួតយ៉ាងខ្លាំង ដោយសារតែមេរោគនោះបានស៊ីដល់សួត។ លោកភរិយាបានធ្លាក់ដល់សភាពនិយាយអត់កើតនិងគ្រាន់តែហូបទឹកក៏អត់កើត ទើបតម្រូវអោយពេទ្យដាក់អ៊ុកស៊ីហ្សែន នៅមុនថ្ងៃស្លាប់។
លោកថាភរិយាស្ថិតក្នុងសភាពវេទនាខ្លាំងណាស់ ដោយសារតែមេរោគចូលស៊ីពេញខ្លួន ហើយលោកគឺជាអ្នកមើលឃើញដោយផ្ទាល់ ទើបលោកមានការរន្ធត់ចិត្តនឹងជំងឺដ៏កាចសាហាវមួយនេះ។ លោកទទូចអោយអ្នកគាំទ្រកុំមើលស្រាលដុំគីសនិងសារភាពថាពិធីបុណ្យសពរបស់ភរិយាមិនធ្វើឡើងធំដុំអោយសមនឹងកេរ្តិ៍ឈ្មោះក្នុងអាជីពជាតារាចម្រៀងរបស់លោកនោះទេ គឺធ្វើតាមលទ្ធភាពរបស់គ្រួសារលោកប៉ុណ្ណោះ។
លោកថាទីតាំងបុណ្យសព គឺជាស្រុកកំណើតរបស់ភរិយា ដោយចំពោះរូបលោកគឺមានស្រុកកំណើតនៅឯខេត្តបន្ទាយមានជ័យឯណោះទេ។ លោកថាអះអាងភរិយាអត់បានរៀនសូត្រអ្វីទេ ដោយអ្នកស្រីជាកូនអ្នកខ្សត់នៅខេត្តតាកែវនិងបានជួបគ្នាក្នុងពេលអ្នកស្រីមកធ្វើជាបុគ្គលិច្នៃត្បូងនៅក្នុងហាងមួយនៅភ្នំពេញក្នុងពេលដែលលោកពេលនោះបានច្រៀងតាមរង្គសាលក្នុងតម្លៃតិចបណ្ដើរៗ ធ្វើសំណង់បណ្ដើរ និងស្គាល់គ្នាតាមរយៈនៅជួលផ្ទះនៅម្ដុំវត្តនាគវ័ន្តជាមួយគ្នា។
លោកថាទំនាក់ទំនងស្នេហាកើតឡើងមុនពេលលោកបានច្រៀងនៅហង្សមាស ហើយក៏មិនបានរៀបការនោះដែរ គឺបានត្រឹមតែការសែនព្រេនចាស់ៗនៅស្រុកកំណើតប៉ុណ្ណោះដោយសារតែភាពក្រីក្រ។ លោកថាខ្លួនបន្តបិទបាំងជំងឺរបស់ភរិយាបានរហូតបើទោះជាមានបណ្ដាញសារព័ត៌មានចុះផ្សាយហូរហែរ ក៏អ្នកស្រីនៅតែមិនដឹងថាជំងឺមហារីកដែលខ្លួនបានកើតជាជំងឺមើលមិនជានោះទេ។
លោកនិយាយថា «ប្រពន្ធខ្ញុំគិតអត់ចេះអក្សរអីទេ ហើយស្លូតណាស់ ទើបខ្ញុំអត់បោះបង់គាត់! មុនស្លាប់មានគេប្រាប់គាត់ថាគាត់កើតជំងឺមហារីក តែខ្ញុំនៅតែកុហកគាត់ថាជំងឺហ្នឹងអត់អីទេតែតិចទៀតជាហើយ គឺគាត់ជឿខ្ញុំ!»។
លោកថាភរិយាមិនមែនស្លាប់នៅមន្ទីរពេទ្យរុស្ស៊ីនោះទេ គឺក្រុមគ្រូពេទ្យបានយល់ព្រមអោយលោកយកអ្នកស្រីចេញមកស្រុក បន្ទាប់ពីបានដឹងថាសភាពអ្នកជំងឺធ្លាក់ដល់អស់លទ្ធភាពក្នុងការព្យាបាល។
អ្នកស្រីបានដាច់ដង្ហើមនៅវេលាម៉ោង៣ និង១០នាទី រសៀលកាលពីថ្ងៃទី២៣ មេសា គឺនៅតែពេលអ្នកស្រីត្រូវបានដឹកទៅដល់ស្រុកកំណើតប្រមាណជា១០នាទី។
លោកថាមុនចូលសង្គ្រោះបន្ទាន់ ភរិយារបស់លោកបានសុំទិញសក់តម្លៃ១៥០ដុល្លារគ្រាន់ពាក់នឹងគេ ហើយលោកក៏បានយល់ព្រមបន្ទាប់ពីសក់កំណើតបានជ្រុះដោយក្រោយពីចាក់ថ្នាំគីមីបានម្ដងដែលមានកម្លាំងប្រសើរតិចអ្នកស្រីក៏បានសុំលោកប្ដីមកធ្វើបុណ្យនៅស្រុកបានម្ដងផងដែរ ដើម្បីចែកសំពត់និងអាវមួយចំនួនជូនដល់ចាស់ៗ។ លោករិន សាវ៉េត បញ្ជាក់សពរបស់ភរិយាលោកនឹងបូជានៅល្ងាចថ្ងៃទី២៤ មេសានេះ ដោយសារតែលោកអាចារ្យគន់គូរ៕